Senat fonogrammany paıdalanýdy shekteý týraly zańdy Májiliske qaıtardy
ASTANA. KAZINFORM — Búgin Senattyń jalpy otyrysynda «Qazaqstan Respýblıkasynyń keıbir zańnamalyq aktilerine mádenıet, bilim berý, otbasy jáne memlekettik baqylaý máseleleri boıynsha ózgerister men tolyqtyrýlar engizý týraly» Zańy eki oqylymda qaraldy. Senat qujattyń jekelegen baptaryn jańa redaktsııada usynyp, ony Májiliske qaıtardy.
Zań mádenıet, bilim berý, otbasy jáne memlekettik baqylaý salalaryn retteýdiń normatıvtik negizin tujyrymdamalyq turǵydan ózektendirýge múmkindik beredi jáne ulttyq zańnama men onyń quqyq qoldaný praktıkasyn odan ári jetildirýge yqpal etedi.
- Qaralyp otyrǵan zań jumys toby otyrystarynda jan-jaqty talqylandy, suraqtarǵa jaýaptar alyndy. Degenmen, zańdy jumys toptarynyń, komıtettiń keńeıtilgen otyrystarynda qaraý barysynda zańnamalyq sıpatqa ıe birqatar usynys pen eskertýler jınaqtalǵanyn atap ótkimiz keledi, - dedi senator Talǵat Júnisov.
Bul turǵyda zańdy Qazaqstan Respýblıkasy Parlamentiniń Senatynda qaraý barysynda tıisti ózgerister men tolyqtyrýlar engizildi. Qazaqstan Respýblıkasynyń «Mádenıet týraly»
Zańynda:
- televızııalyq jazbalar men kontserttik oıyn-saýyq mádenı-buqaralyq is-sharalardy ótkizýge beıimdelmegen oryndardy qospaǵanda, uıymdastyrýshylardy, shyǵarmashylyq ujymdardy jáne oryndaýshylardy kontserttik oıyn-saýyq mádenı-buqaralyq is-sharalarda daýystyq (vokaldyq) fonogrammalardy paıdalanýyna tyıym salýdy kózdeıtin ózgeristi naqtylaý;
- zańnamada belgilengen jaǵdaılarda oıyn-saýyq mádenı-buqaralyq is-sharalardy ótkizý jáne mýzykalyq shyǵarmalardy oryndaý kezinde daýystyq (vokaldyq) fonogrammalardy paıdalaný týraly kórermenderdi habardar etýdi mindetteıtin jáne «Tutynýshylardyń quqyqtaryn qorǵaý týraly» qoldanystaǵy zańnyń tıisti normasyn osy túzetýge sáıkestendirý;
- jeke tulǵalardy buqaralyq aqparat quraldarynda nemese onlaın-platformalarynda avtorlyq quqyq obektileri sanalatyn týyndylardy jarııa paıdalanýy kezinde avtordyń (avtorlardyń) atyn kórsetýge mindetteý jónindegi normany qoldanystaǵy zańnamaǵa qatysty retteý;
- orta bilim berý uıymdarynyń memlekettik obektilerin salýdy, rekonstrýktsııalaýdy jáne kúrdeli jóndeýdi tıisti kólemde qarjyladandyratyn jergilikti atqarýshy organdardyń tiziminen aýdandar men oblystyq mańyzy bar qalalardy alyp tastaý jónindegi túzetýler qamtylǵan.
- Sondaı-aq zańnyń keıbir baptarynyń kúshine ený merzimderin qaıta qarastyrý jónindegi usynystar qaraldy, - dedi depýtat.
Eske salsaq, byltyr QR Mádenıet jáne aqparat mınıstri Aıda Balaeva fonogrammamen án aıtý, avtorlyq quqyq máselesi zań arqyly retteletinin aıtqan edi.