Senat Eýrazııalyq ekonomıkalyq qoǵamdastyqtyń qyzmetin toqtatý týraly shartty ratıfıkatsııalady
ASTANA. QazAqparat - Búgin Parlament Senatynyń jalpy otyrysynda «Eýrazııalyq ekonomıkalyq qoǵamdastyqtyń qyzmetin toqtatý týraly shartty ratıfıkatsııalaý týraly» QR zańy qabyldandy.
Shartqa Eýrazııalyq ekonomıkalyq qoǵamdastyqqa múshe memleket basshylary aǵymdaǵy jyldyń 10 qazanynda Mınsk qalasynda qol qoıǵan bolatyn.
Toqtala ketetin jaıt, Mınskidegi kezdesý barysynda Memleket basshylary Eýrazııalyq ekonomıkalyq odaq qurǵan kezden bastap atalǵan qoǵamdastyqty taratý týraly kelisken edi. Syrtqy ister mınıstri Erlan Ydyrysovtyń aıtýynsha, buǵan birqatar sebepter bar. «Birinshiden, EýrAzEQ óziniń tarıhı mindetin oryndady. Onyń sheńberinde Keden odaǵy, Biryńǵaı ekonomıkalyq keńestik qurylyp, Eýrazııalyq ekonomıkalyq odaq jańa 2015 jyldan óz jumysyn bastaǵaly otyr. Ekinshiden, bir keńistikte bir-biriniń fýnktsııalaryn qaıtalaıtyn eki uqsas uıymnyń bolýy qajet emes», - dedi ol.
Osyǵan oraı, 2015 jyldyń 1qańtarynan bastap qoǵamdastyqtyń jáne onyń organdarynyń, sonyń ishinde Integratsııalyq komıtet hatshylyǵynyń, Parlamenttik Assambleıanyń jáne EýrAzEQ sotynyń qyzmetin toqtatý qarastyrylǵan. Jalpy, qujatta EýrAzEQ taratylǵan soń kúshi joıylatyn nemese saqtalatyn halyqaralyq sharttardyń tizbeleri de berilgen. Atap aıtqanda, barlyǵy 150 halyqaralyq sharttar bolsa, onyń ishinde 60 sharttyń kúshi joıylyp, 90-y saqtalady.
Parlament qabyldaǵan Zań Memleket basshysynyń qol qoıýyna joldanady.
