Senat Eýrazııalyq ekonomıkalyq odaq týraly shartqa usynylǵan ózgeristerdi ratıfkatsııalady
Senat Eýrazııalyq ekonomıkalyq odaq týraly shartqa usynylǵan ózgeristerdi ratıfkatsııalady, dep habarlaıdy Kazinform.
Eýrazııalyq ekonomıkalyq odaq týraly shartqa ózgerister engizý týraly hattamany ratıfıkatsııalaýdyń ne úshin qajet ekenin senator Serik Óteshov baıandady. Onyń sózinshe, hattama Eýrazııalyq ekonomıkalyq odaq týraly shartqa 106 túzetý engizedi. Ol ózgeristerdiń eń negizgi degenderi mynalar:
1) Fıtosanıtarııalyq sertıfıkattar men memlekettik tirkeý týraly kýálikterdi elektrondy túrde rásimdeý múmkindigi paıda bolady. Qazir bul qujattar ózara saýdada qaǵaz kúıinde usynylyp júr.
2) Básekelestik erejelerin saqtaý salasynda Eýrazııalyq ekonomıkalyq komıssııanyń sheshimderin oryndamaǵany úshin aıyppuldar engizilmek.
Sharttyń qoldanystaǵy redaktsııasynda aıyppul salý týraly Komıssııa sheshimderin jáne buzýshyny belgili bir áreketterdi jasaýǵa mindetteıtin Komıssııa sheshimderin oryndamaǵany úshin jaýapkershilik kózdelmegen. Usynylǵan túzetý Komıssııa sheshimderin oryndamaǵany úshin jazanyń qaıtymsyzdyǵyn qamtamasyz etedi.
3) Dempıngke qarsy qaıta tergeý tetigi engiziledi. Eger sheteldik óndirýshi taýarlardy dempıngtik baǵamen jetkizgeni anyqtalsa, komıssııa dempıngke qarsy sharalardy belgileýge quqyly. Osy maqsatpen dempıngke qarsy qaıta tergeý júrgizý tetigi engiziledi.
«Usynylǵan tetik qazaqstandyq óndirýshilerdi úshinshi elder óndirýshileriniń josyqsyz saýda tájirıbesinen qorǵaýǵa múmkindik beredi. Tórtinshi, pedagogıka jáne zań qyzmeti salasyndaǵy jumyskerler úshin Eýrazııalyq ekonomıkalyq odaqtyń basqa múshe memleketinde bilim týraly qujattardy taný jónindegi talaptar alynyp tastalady. Bul eńbek mıgranttarynyń osy sanatyn jumysqa ornalastyrý kezindegi sharttardy jeńildetýge baǵyttalǵan», - dedi Serik Óteshov.
Ózgeristerdiń besinshi baǵyty Eýrazııalyq ekonomıkalyq odaq organdarynyń qabyldanǵan aktileriniń naqty áserin baǵalaýdy kózdeıdi.
«Bul qural Komıssııanyń buryn qabyldanǵan sheshimderine qatysty naqty áserdi baǵalaýǵa múmkindik beredi. Atalǵan tetikterdi engizý bıznesti júrgizý sharttaryn qatańdatatyn, sondaı-aq kásipkerlerdiń negizsiz shyǵyndaryna ákep soqtyratyn artyq erejelerdi anyqtaýǵa jáne joıýǵa, bıznesti júrgizý sharttaryn jaqsartýǵa jáne Eýrazııalyq ekonomıkalyq odaq quqyǵyn quraıtyn aktilerdiń ashyqtyǵyn arttyrýǵa múmkindik beredi», - dedi senator.
Senat depýtattary daýysqa salý qorytyndysy boıynsha atalmysh zańdy maquldaý týraly sheshim qabyldady.
