Senat erekshe qorǵalatyn tabıǵı aýmaqtarda tólemdi alyp tastaý týraly zańdy maquldady
ASTANA. KAZINFORM – Búgin Senattyń jalpy otyrysynda «Qazaqstan Respýblıkasynyń keıbir zańnamalyq aktilerine erekshe qorǵalatyn tabıǵı aýmaqtar jáne elektr energetıkasy máseleleri boıynsha ózgerister men tolyqtyrýlar engizý týraly» zańy men ilispe qujat eki oqylymda qaralyp, maquldandy.
«Atalǵan zańdar erekshe qorǵalatyn tabıǵı aýmaqtardy paıdalaný, elektr energetıkasy salasyndaǵy zańnamany odan ári jetildirý, sondaı-aq turmystyq tehnıkanyń otandyq óndirisin qoldaý maqsatynda ázirlenip, Qazaqstan Respýblıkasynyń Bıýdjet, Salyq, Orman kodeksterine jáne qoldanystaǵy birqatar zańǵa túzetýler engiziledi. Birinshiden, erekshe qorǵalatyn tabıǵı aýmaqtar aıasynda tólemdi respýblıkalyq, oblystyq bıýdjetke jáne respýblıkalyq mańyzy bar qalanyń, astananyń bıýdjetterine túsetin túsimderden alyp tastaý, sondaı-aq oblystardyń, respýblıkalyq mańyzy bar qalalardyń jáne astananyń máslıhattarynyń tólemaqy mólsherlemesin bekitý quzyretin alyp tastaý eskerilgen. Memlekettik organdardyń quzyretine qaraýynda bar tabıǵı aýmaqtardy keńeıtý, ǵylymı zertteý jáne tehnıkalyq-ekonomıkalyq negizdemelerdiń jobalaryn ázirleý, qyzmetter úshin tarıfterdiń mólsherin bekitý usynyldy», - dedi senator Bekbolat Orynbekov.
Onyń paıymynsha, bul ózgerister otandyq týrıstik bıznesti odan ári damytý úshin qolaıly jaǵdaılar jasaý, sondaı-aq bıoártúrlilik pen ekojúıelerdi saqtaý úshin mańyzdy sanalatyn tabıǵı aımaqtarda zertteýlerdi júrgizý múmkindikterin keńeıtedi.
Ekinshiden, zańda turmystyq quraldardy nemese turmystyq elektrotehnıka jabdyqtaryn, sondaı-aq olardyń quramdastaryn ótkizetin ózge de adamdardy (dıstrıbıýtorlardy) qosylǵan qun salyǵyn tóleýden bosatý bóliginde Salyq kodeksiniń 394-babynyń redaktsııasyn naqtylaý qarastyryldy. Osy túzetýler turmystyq tehnıkanyń iri álemdik brendterin Qazaqstan Respýblıkasyndaǵy óndiriske tartý múmkindigin jáne elimizde óndirilgen turmystyq tehnıkanyń qunyn tómendetýge yqpal tıgizedi.
