Senat energııany Eýropaǵa eksporttaýǵa arnalǵan qujatty maquldady
ASTANA. KAZINFORM — Búgin Senattyń jalpy otyrysynda «Ázerbaıjan Respýblıkasy, Qazaqstan Respýblıkasy jáne Ózbekstan Respýblıkasy arasyndaǵy jasyl energııany óndirý jáne berý salasyndaǵy strategııalyq áriptestik týraly kelisimdi ratıfıkatsııalaý týraly» Zań maquldandy.
Atalǵan kelisimge 2024 jylǵy 13 qarashada Baký qalasynda úsh memlekettiń basshylary qol qoıǵan bolatyn. Qujattyń maqsaty — jańartylatyn energııa kózderin damytý salasynda úsh memleket arasyndaǵy uzaq merzimdi strategııalyq áriptestiktiń quqyqtyq negizin qalyptastyrý.
— Qujat energetıkalyq júıelerdi biriktirýge jáne «taza» energııany Eýropaǵa jáne basqa óńirlerge tranzıtteýdi uıymdastyrýǵa negiz qalaıdy. Kelisim elektr energııasyn senimdi ári úzdiksiz jetkizýdi qamtamasyz etý úshin tehnıkalyq jáne kommertsııalyq sharttardy belgileıdi. Bul Qazaqstanǵa eksport baǵyttaryn ártaraptandyrýǵa jáne Qara teńizdegi sýasty elektr energııa jelisi jobasy arqyly Eýropalyq Odaqtyń «jasyl» energııa naryǵyna shyǵýǵa múmkindik beredi. Sondaı-aq zań ekologııalyq taza sýtegi men ammıakty óndirý jáne tasymaldaý salasyndaǵy yntymaqtastyqty keńeıtýge jol ashady. Bul — kómirtegi beıtaraptyǵyna qol jetkizý jónindegi ulttyq strategııamyzdy iske asyrýdaǵy mańyzdy qadam, — dedi senator Súıindik Aldashev
Kelisim aıasynda basqarýdyń ınstıtýtsıonaldyq tetigin qurý jáne salalyq vedomstvolar deńgeıinde Basqarýshy komıtet qalyptastyrý kózdelgen. Bul komıtet birlesken josparlardyń oryndalýyn baqylaý úshin jylyna keminde eki ret jınalatyn bolady. Qujatty ratıfıkatsııalaý elimizge óńirlik energetıkalyq hab retindegi mártebesin nyǵaıtýǵa jáne tómen kómirtekti ónim eksporttaý arqyly ekonomıkanyń turaqty ósýin qamtamasyz etýge múmkindik beredi.
— Aıta ketý kerek, kelisim tek elektr energııasyn jetkizýmen shektelmeıdi, sonymen qatar «jasyl» sýtegi men ammıak salalaryn damytýǵa serpin beredi. Qazaqstanda 2040 jylǵa deıingi sýtegi energetıkasyn damytý jónindegi jańartylǵan tujyrymdama qabyldanǵanyn eskersek, bul baǵyttyń mańyzy arta túsedi. Búginde Qazaqstan jańartylatyn energııa kózderiniń áleýetin belsendi túrde arttyryp jatyr. Energetıka mınıstrliginiń derekterine sáıkes, 2026 jylǵy birinshi toqsannyń qorytyndysy boıynsha elde jalpy qýaty 3 607 MVt bolatyn 164 JEK nysany jumys isteıdi. Onyń ishinde 68 jel elektr stantsııasy, 50 kún elektr stantsııasy, 43 sý elektr stantsııasy jáne 3 bıogaz elektr stantsııasy bar. Ótken jyldyń qorytyndysy boıynsha «jasyl» energııa óndirý kólemi 8,6 mlrd kVt/saǵatty qurady, bul eldegi jalpy óndiris kóleminiń 7 paıyzyna teń. Atalǵan energetıkalyq dálizdi iske qosý Kaspıı óńiri men Ortalyq Azııanyń tabıǵı resýrstaryn tıimdi paıdalaný úshin óńirlik seriktestermen kúsh biriktirýge múmkindik beredi, — dedi depýtat.
Aıta keteıik, Energetıka mınıstrligi 2026 jyly ekologııalyq taza energııa óndirý kólemin 8,8 mlrd kVt·saǵ deıin arttyrý josparlanǵanyn habarlaǵan edi.
