Senat energııa únemdeý týraly zań jobasyn Májiliske keri qaıtardy
«Zań jobasymen bes baǵyt boıynsha mindetterdi júzege asyrý qarastyrylady. Bul baǵyttar: Ekonomıka sektorlarynyń energııa tıimdiligin arttyrý jáne jalpy ishki ónimniń energııa syıymdylyǵyn tómendetý, elektr stantsııalarynda gaz qondyrǵylaryn salý boıynsha ınvestıtsııalyq jobalardy iske asyrý, Almaty qalasyn damytý sheńberinde qoǵamdyq qatynastardy retteýdi jetildirý, dástúrli emes kómirsýtekterdi óndirýdi damytý, sondaı-aq shekara bólimsheleri men memlekettik shekara arqyly ótkizý pýnktterin salý jónindegi máselelerdi sheshý bolyp tabylady. Atalǵan zań jobasy jumys tobynyń otyrystarynda, turaqty komıtetterde, komıtettiń keńeıtilgen otyrysynda jan-jaqty talqylanyp qaraldy», - dedi Senat depýtaty Erik Sultanov búgingi jalpy otyrysta.
Onyń aıtýynsha, zań jobasyn talqylaý barysynda Senat depýtattary birqatar ózgerister men tolyqtyrýlar engizdi.
«Onyń ishinde jyljymaıtyn múlikti rásimdeý máselelerin qaraý jónindegi komıssııanyń qyzmeti men quzyreti boıynsha normalardy naqtylaý («Almaty qalasynyń erekshe mártebesi týraly» QR Zańyna túzetýler). Kóppáterli turǵyn úılerdiń kondomınıým obektisin basqarýdyń jańa nysandaryna kóshý merzimderin 2023 jylǵy 1 shildege deıin uzartý («QR keıbir zańnamalyq aktilerine turǵyn úı-kommýnaldyq sharýashylyq máseleleri boıynsha ózgerister men tolyqtyrýlar engizý týraly» QR Zańyna túzetýler). QR Ulttyq ǵylym akademııasynyń uıymdyq-quqyqtyq nysanyn ózgertý jáne onyń negizgi ókilettikterin aıqyndaý, sondaı-aq Ulttyq ǵylym akademııasynyń akademıgi uǵymyn bekitý jáne zeınet jasyna jetken kezde oǵan ómir boıǵy aı saıynǵy stıpendııa belgileýdi engizý quqyǵyn beretin normalar qarastyrylǵan («Ǵylym týraly» QR Zańyna túzetýler)», - dedi E. Sultanov.
Barlyq eskertpeler men usynystar salystyrmaly kestege engizilgen jáne jınaqtalǵan.
«Baıandalǵandy eskere kele, Ekonomıkalyq saıasat, ınnovatsııalyq damý jáne kásipkerlik komıteti Parlament Májilisi maquldaǵan «Qazaqstan Respýblıkasynyń keıbir zańnamalyq aktilerine elektr energetıkasy, energııa únemdeý jáne energııa tıimdiligin arttyrý, jer qoınaýyn paıdalaný, jergilikti memlekettik basqarý jáne memlekettik shekara máseleleri boıynsha ózgerister men tolyqtyrýlar engizý týraly» QR Zańynyń jobasyna ózgerister men tolyqtyrýlardy Qazaqstan Respýblıkasy Konstıtýtsııasy 61-babynyń 5-tarmaǵyna sáıkes Parlament Májilisine jiberýdi usynady», - dedi E. Sultanov.
Depýtattardyń daýys berý nátıjesinde zań jobasyna Senat engizgen 6 túzetý Májiliske qaıta jiberildi.
