Senat energııa únemdeý máselesin qaraıtyn zań jobasyn Májiliske qaıtardy
ASTANA. QazAqparat - Búgin Parlament Senatynyń jalpy otyrysynda «Energııa únemdeý jáne energııa tıimdiligin arttyrý týraly» QR zańyna ózgerister men tolyqtyrýlar engizý týraly» zań jobasy eki oqylym boıynsha talqylanyp, qujat Májiliske qaıtaryldy.
Zań jobasy energııa tıimdiligin arttyrý tetigin odan ári jetildirý jáne óndiris sektory men energııa resýrstaryn tutyný salasynda ozyq enerııalyq tıimdi tehnologııalardy qoldaný maqsatynda ázirlengen.
Investıtsııalar jáne damý vıtse-mınıstri Albert Raýdyń aıtýynsha, 2012 jyly elimizde energııa únemdeý men energııa tıimdiligine qatysty jańa zań qabyldanǵan bolatyn. Sonyń nátıjesinde energııa únemdeý baǵdarlamasyn júzege asyrýǵa múmkindik týdy. Qazirgi tańda memlekettik energetıkalyq reestr quryldy, oǵan 4 myńnan astam uıymdar ense, 60 energııa-aýdıtorlyq kompanııa akkredıttelgen. «Sonymen bir mezgilde energııa únemdeý sharalaryn qarjylandyrý baǵytynda belgili bir qıynshylyqtar oryn alýda. Osyǵan baılanysty, zań jobasy energııa-servıstik kompanııalardyń qyzmetin júzege asyrý úshin zańnamalyq negiz qalyptastyrylady», - dedi A. Raý.
Tutastaı alǵanda, zań jobasy energııa-servıstik kompanııanyń óz shyǵyndarynyń ornyn toltyra otyryp, tartylǵan qarajaty esebinen energııany únemdeý tehnologııalaryn engizý jóninde jeke jáne zańdy tulǵalarmen sharttar jasaýǵa múmkindik beredi. Al onyń nátıjesinde energııa shyǵyndarynyń qol jetkiziletin únemdelýinen qarjylaı paıda alý kózdeledi.
Ekinshi oqylymǵa talqylaý barysynda senatorlar qujatqa birqatar túzetýler engizdi. Atap aıtqanda, joǵary palata depýtattary energııa menedjment júıesin qurý, engizý men uıymdastyrýǵa mindettemeler belgileý men baqylaý jasaý normalaryn alyp tastaýdy usynyp otyr.
