Senat energııa óndiretin uıymdy qoldaýǵa arnalǵan qujatty maquldady

ASTANA. KAZINFORM – Búgin Senattyń jalpy otyrysynda «Salyq jáne bıýdjetke tólenetin basqa da mindetti tólemder týraly» Kodeksine ózgeris pen tolyqtyrýlar engizý týraly» Zań eki oqylymda qaralyp, maquldandy.

Atalǵan zańnyń maqsaty - kommýnaldyq menshiktegi energııa óndirýshi uıymdarǵa beriletin sýbsıdııalardy, granttardy jáne ózge de óteýsiz kómekti alýshylardy memlekettik qoldaý aıasynda memlekettik sýbsıdııalardy tolyq ıgerýdi qamtamasyz etý.

- Zańnyń negizgi mindeti salyq rejımin naqtylaýǵa negizdelgen. Atap aıtqanda, Qazaqstan Respýblıkasy Úkimetiniń rezervinen jáne jergilikti atqarýshy organdardan bólingen sýbsıdııalardy, granttardy nemese ózge de óteýsiz kómekti salyq salý maqsatynda tabys retinde qaramaý, sondaı-aq sýbsıdııalar esebinen júrgizilgen shyǵystardy shegerimge qabyldamaý usynylady. Bul normalar aktsııalarynyń nemese qatysý úlesteriniń júz paıyzy memleketke tıesili, kommýnaldyq menshiktegi jáne elektr energııasyn, sýdy (dıstıllıatty) ári jylý energııasyn óndirý jónindegi qyzmetti bir mezgilde júzege asyratyn energııa óndirýshi uıymdarǵa qoldanylady, - dedi senator Bekbol Orynbasarov.

Onyń atýynsha, zańnyń qabyldanýy qarjy qarajatyn basym ári asa mańyzdy qajettilikterge qaıta bólýge múmkindik beredi, óndiristik qyzmetti qoldaýǵa jáne jańǵyrtýǵa, sondaı-aq áleýmettik mindettemelerdi oryndaýǵa arnalǵan qarajatty qaıta ınvestıtsııalaý múmkindigin qamtamasyz etedi dep eskerilgen. Budan basqa, zań energetıkalyq qýattardy saqtaýǵa jáne halyq pen kásiporyndardyń ekonomıkalyq múddelerin qorǵaýǵa baǵyttalǵan.

Budan deıin osy qujatty Parlament Májilisinde talqylaý kezinde MAEK-ti qoldaýǵa bólingen qarajatqa salyq salynbaıtynyn jazǵan edik.