Senat endaýment-qorlar týraly zańdy maquldady
ASTANA. KAZINFORM – Búgin Senattyń jalpy otyrysynda «Nysanaly kapıtal qorlary jáne endaýment-qorlar (nysanaly kapıtaldar) týraly» Zańy maquldandy.
Zańnyń maqsaty - nysanaly kapıtal qorlary men endaýment-qorlardy qalyptastyrý jáne olardyń jumys isteýi úshin quqyqtyq negiz jasaý. Qujattyń negizgi mindetteri retinde nysanaly kapıtal qorlaryn qurý, basqarý ári taratý, endaýment-qorlardy qalyptastyrý, tolyqtyrý, taratý jáne olardyń ınvestıtsııalyq kiristerin paıdalaný, endaýment-qorlardyń aktıvterin senimgerlik basqarý kezinde týyndaıtyn qatynastardy retteý anyqtalady.
- Zańda endaýment-qordy kommertsııalyq emes uıym nysanynda qurý jáne ony basqarý tetikteri aıqyndalady. Qorlardyń ınvestıtsııalyq tabysyn bilim berý, ǵylym jáne ınnovatsııalyq qyzmet, buqaralyq sport, dári-dármekpen qamtamasyz etý, medıtsınalyq qyzmetter kórsetý jáne áleýmettik salany qoldaý baǵyttaryna jumsaý kózdeledi. Osy rette, Qordyń qaıyrymdylyq baǵdarlamasynda kózdelgen qaıyrymdylyq obektilerin turaqty qarjylyq qoldaý, ınvestıtsııalyq deklaratsııaǵa jáne elimizdiń zańnamasyna sáıkes endaýment-qordyń aktıvterin ınvestıtsııalaý, paıda alýshylarǵa qaıyrymdylyq kómek kórsetý úshin qosymsha qarajat tartý jónindegi tetikter, sondaı-aq nysanaly kapıtal qory qyzmetiniń ashyq bolýy men eseptiligin qamtamasyz etý, salymshylardyń zańdy múddelerin qorǵaý kózdeledi, - dedi senator Altynbek Nýhuly.
Onyń aıtýynsha, qordyń qarjy aktıvteriniń kólemi on myń eselengen aılyq eseptik kórsetkishten asqan kezde, nysanaly kapıtal qory kásibı basqarýshy kompanııanyń senimgerlik basqarýyna berilýi mindetteledi. Qordyń aktıvterin basqarýdy ınvestıtsııalyq portfeldi basqarýǵa lıtsenzııasy bar baǵaly qaǵazdar naryǵynyń kásibı qatysýshysy júzege asyrady.
- Zańdy qabyldaý aýqatty azamattarymyzdyń áleýmettik mańyzy bar jobalarǵa ınvestıtsııalardy belsendi salýǵa jol ashady. Іri ınvestorlarmen qatar, qarapaıym azamattar da qaıyrymdylyq jobalaryna óz úlesin qosa alady. Osylaısha, endaýment-qorlar esebinen turaqty qarjy kózderin qurý - áleýmettik salanyń, ǵylymnyń, bilim berý, densaýlyq saqtaý, mádenıet pen sport júıeleriniń damýyn yntalandyrady, olardyń uzaq merzimdi básekelestigin arttyrady jáne bul memlekettik bıýdjetke túsetin salmaqty kezeń-kezeńimen azaıtýǵa múmkindik beredi, - dedi depýtat.
Eske salsaq, bıyl Májilis depýtaty Juldyz Súleımenova Qazaqstanǵa endaýment qorlar ne úshin kerek ekenin túsindirgen edi.