Senat Eńbek kodeksi jobasyn birinshi oqylymda maquldady
Tutastaı alǵanda, jańa Eńbek kodeksi eńbek qatynastary salasynda jumys berýshi men qyzmetkerler arasynda memlekettik aralasý shegin aıqyndaýdy, eńbek qatynastary sýbektileriniń róli men jaýapkershiligin jikteýdi usynady.
«Memleket jumyskerlerge beriletin kepildeme men ótemaqynyń eń tómengi eńbek standarttaryn anyqtap, jumys berýshiler tarapynan olardyń oryndalýyna qatań baqylaý júrgizedi. Bul rette eń tómengi áleýmettik standarttar árbir azamattyń eńbek bostandyǵyn, qaýipsizdik jáne gıgıena talaptaryna saı eńbek jaǵdaıyn, eńbekke qandaı da bir kemsitýshiliksiz ótemaqy alýyn qamtamasyz etedi. Jumys berýshiler men qyzmetkerdiń araqatynastary basym túrde ujymdyq kelisimder men sharttar arqyly retteý qaǵıdattaryna negizdeletin bolady», deıdi Densaýlyq saqtaý jáne áleýmettik damý mınıstri Tamara Dúısenova. Onyń sózine qaraǵanda, zańdardyń ıkemdiligi ınvestorlar úshin ǵana emes, eń aldymen, jumys oryndary úshin halyqty jumyspen qamtý kózi bolyp tabylatyn kásiporyndar úshin de mańyzdy. Osyǵan baılanysty kodeks jobasynda jumys berýshiler úshin bir jaǵynan belgili bir kólemde jumysqa jaldaý, kadrlyq jyljý, jumystan bosatý, qyzmetkerleriniń eńbek jaǵdaılary men eńbegine aqy tóleý rásimderi jeńildetilgen. Ekinshi jaǵynan qyzmetkerlerdiń bazalyq eńbek múmkindikteri men quqyqtary belgilenip, jeke ujymdyq sharttar men kelisimder arqyly keńeıtý kózdeledi. Osylaısha, óz dárejesinde damymaı kelgen kelisimder men ujymdyq sharttar rólin kóterý qarastyrylady.
«Jańa Eńbek kodeksi jobasy kásipkerlikti, eńbek naryǵyn damytýdy, sheteldik ınvestorlar tartýdy belsendire túspek. Budan basqa, múgedekterdi, jastardy, otbasylyq mindetteri bar adamdardy qosa alǵanda, jumyskerlerdiń jekelegen sanattary úshin jumys oryndaryn qurýǵa yntalandyrýǵa baǵyttalǵan birqatar sharalar da qamtylady. Jalpy, kodeks jobasynda áleýmettik qorǵaý, ádilettilik, ekinshi jaǵynan, ekonomıkalyq tıimdilik arasyndaǵy ońtaıly tepe-teńdikti úılestirýdi saqtaý kózdeledi», - deıdi mınıstr.