Senat Eńbek qaýipsizdigi men gıgıenasyna járdemdesetin 187-konventsııany qabyldady
ASTANA. QazAqparat - Búgin Parlament Senaty «Eńbek qaýipsizdigi men gıgıenasyna járdemdesetin negizder týraly konventsııany (187-konventsııa) ratıfıkatsııalaý týraly» Zańyn qabyldady. Qujat Memleket basshysynyń qol qoıýyna joldanady.
Bul Konventsııa 2006 jylǵy 15 maýsymda Jeneva qalasynda Halyqaralyq eńbek uıymy Bas konferentsııasynyń 95-shi sessııasynda qabyldandy. Al búginge deıin ony Halyqaralyq eńbek uıymyna múshe 25 el, sonyń ishinde TMD aýmaǵynda Reseı men Moldova ratıfıkatsııalaǵan.
Konventsııanyń erejeleri óndiristik jaraqattaný, kásiptik aýrýǵa shaldyǵý jáne óndiriste adamdardyń qaza bolý jaǵdaılarynyń aldyn alý maqsatynda eńbek qaýipsizdigi men gıgıenasyn jan-jaqty jáne turaqty reformalaýǵa yqpal etetin ınstıtýtsıonaldyq sharalardyń qoldanylýyn kózdeıdi. Atap aıtqanda, eńbekti qorǵaý salasynda ulttyq saıasatty, ulttyq júıeni jáne ulttyq baǵdarlamany qurý usynylady. Bul rette árbir qatysýshy memleket óziniń ulttyq saıasatyn ázirleý kezinde ulttyq jaǵdaılary men praktıkasyn eskere otyryp, kásiptik qaterlerdi nemese qaýipterdi baǵalaý, ondaı qaýipter týyndaǵan jerde olarǵa qarsy kúresý, aqparatty, konsýltatsııalar men daıyndyqty qamtıtyn eńbek qaýipsizdigi men gıgıenasy salasyndaǵy ulttyq profılaktıka mádenıetin damytý sııaqty negiz qalaýshy qaǵıdattardy ustanýǵa tıis.
Al Qazaqstanǵa kelsek, qazirgi tańda atalǵan Konventsııany qabyldaýǵa qajetti jaǵdaılar men alǵysharttar elimizde qalyptasqan. Óıtkeni, Qazaqstanda búgingi kúni qyzmetkerler densaýlyǵy zaqymdanýynyń kásibı qater deńgeıi ózekti máselege aınalyp barady. Osyǵan baılanysty qazirgi ýaqytta Úkimet eńbekti qorǵaýdy basqarýdyń ornyn toltyrýshy, shyǵyndy úlgisinen, óndiristegi qyzmetkerlerdiń densaýlyǵyn saqtaýdyń perventıvtik tásilderin iske asyrýǵa jáne qolaısyz eńbek jaǵdaılarymen baılanysty shyǵystardyń barlyq túrlerin qysqartýǵa múmkindik beretin jumystardy júrgizýde. Bul kásibı qaterlerdi basqarýdyń zamanaýı júıesine kóshýdi bildiredi. Osy maqsatta Halyqaralyq eńbek uıymynyń 187-konventsııasyn ratıfıkatsııalaý usynylǵan bolatyn.
Tutastaı alǵanda, Qazaqstanǵa eńbekti qorǵaý salasyndaǵy halyqaralyq mindettemelerdi qabyldaý áleýmettik jańǵyrtý qaǵıdalaryna jaýap beredi jáne bul Elbasynyń qaýipsiz eńbek jaǵdaılaryn qamtamasyz etý jónindegi tapsyrmasyn iske asyrýǵa baǵyttalyp otyr.
Toqtala ketetin jaıt, statıstıka derekteri boıynsha elimizde zııandy jáne qaýipti eńbek jaǵdaılarynda jumys isteıtin qyzmetkerlerdiń sany 2014 jyldyń basynda shamamen 376 myń adamdy quraǵan. ıAǵnı, tekserilgen jumyspen qamtylǵan azamattardyń qatarynda árbir besinshi adam osyndaı jaǵdaıda jumys isteıdi.
