Senat elimizge 190 mlrd ıen tartýǵa arnalǵan zańdardy maquldady
ASTANA. KAZINFORM – Búgin Senattyń jalpy otyrysynda Qazaqstan Azııa Damý Bankinen, Azııa Infraqurylymdyq Bankinen, sondaı-aq Halyqaralyq Qaıta qurý jáne Damý bankinen jalpy somasy 190 mlrd ıenge jýyq qarajat tartýǵa arnalǵan úsh qujat maquldandy.
Atap aıtqanda, «Qazaqstan Respýblıkasy men Azııa Damý Banki arasyndaǵy qaryz týraly kelisimdi ratıfıkatsııalaý týraly» Zańy aıasynda 52,3 mlrd somasynda japondyq ıen alý eskerilgen. Azııa Damý Banki Qazaqstan Respýblıkasyna 2027 jylǵy 1 maýsymǵa deıingi jeńildikti kezeńdi qosa alǵanda, 2038 jylǵy 1 jeltoqsanǵa deıingi óteý merzimimen qaryz beredi. Osy qarajat bıylǵy respýblıkalyq bıýdjet tapshylyǵyn qarjylandyrýǵa múmkindik beredi, osylaısha 2024 jylǵa arnalǵan respýblıkalyq bıýdjet aıasynda memlekettiń ózine qabyldanǵan barlyq mindettemeleriniń oryndalýyn qamtamasyz etedi.
Munymen qosa, Senattyń jalpy otyrysynda maquldanǵan «Qazaqstan Respýblıkasy men Halyqaralyq Qaıta Qurý jáne Damý Banki arasyndaǵy qaryz týraly kelisimdi ratıfıkatsııalaý týraly» Zańy aıasynda 84,9 mlrd ıen tartylady. Qaryz týraly kelisimge 2024 jylǵy 11 qazanda qol qoıyldy. Óteý merzimi 2034 jylǵy 15 qyrkúıekke deıin, onyń ishinde 2029 jylǵy 15 naýryzǵa deıingi jeńildik kezeńi. Qaryz qarajaty 2024 jylǵa arnalǵan respýblıkalyq bıýdjet aıasynda qabyldanǵan memlekettiń barlyq mindettemeleriniń oryndalýyn qamtamasyz etýge múmkindik beredi.
Budan bólek, búgin maquldanǵan «Qazaqstan Respýblıkasy men Azııa Infraqurylymdyq Investıtsııalar Banki arasyndaǵy qaryz týraly kelisimdi ratıfıkatsııalaý týraly» Zańy boıynsha 52,7 mlrd ıen alý qarastyrylǵan. Qaryz týraly kelisimge 2024 jylǵy 21 tamyzda qol qoıyldy. Atalǵan bank Qazaqstanǵa 2027 jylǵy 1 maýsymǵa deıingi jeńildikti kezeńdi qosa alǵanda, 2038 jylǵy 1 jeltoqsanǵa deıingi óteý merzimimen qaryz beredi. Onda 3 jyldyq jeńildik kezeńi eskerilgen.
Buǵan deıin Premer-mınıstrdiń orynbasary — Ulttyq ekonomıka mınıstri Nurlan Baıbazarov Qazaqstan Azııa Damý Bankinen, Azııa Infraqurylymdyq Bankinen, sondaı-aq Halyqaralyq Qaıta qurý jáne Damý bankinen jalpy somasy 200 mlrd ıenge jýyq qarajatty ne sebepti tartyp jatqanyn túsindirdi.