Senat elimizde eńbek jaǵdaıyn jaqsartýǵa arnalǵan zańdy maquldady

ASTANA. KAZINFORM — Búgin Senattyń jalpy otyrysynda «Damýshy elderdi erekshe eskere otyryp, eń tómen jalaqyny belgileý týraly konventsııany (131-konventsııa) ratıfıkatsııalaý týraly» Zańy maquldandy.

- «Eń tómengi jalaqyny belgileý týraly» Halyqaralyq eńbek uıymynyń (HEU) № 131 konventsııasy eń tómen jalaqy júıesin engizýdiń halyqaralyq standarttaryn belgileıdi. Bul Konventsııa 1970 jyly qabyldanǵan jáne onyń basty maqsaty – barlyq jumysshylar úshin ádil ári jetkilikti eń tómen jalaqy deńgeıin bekitý júıesin qurý. Konventsııanyń erejeleri ulttyq deńgeıde eń tómen jalaqyny bekitetin ádiletti júıeni engizý arqyly jumysshylardyń ómir súrý deńgeıin arttyrýdy jáne olardyń áleýmettik qorǵalýyn qamtamasyz etýdi kózdeıdi, - dedi senator Ásem Rahmetova.

Atalǵan qujattyń erejeleri jalaqy mólsherin belgileý kezinde ekonomıkalyq faktorlardiń eskerilýin qamtamasyz etedi. Sondaı-aq, eń tómen jalaqyny belgileý, qaıta qaraý kezinde áleýmettik áriptestik taraptardyń mindetti qatysýy kózdeledi.

Eń tómen jalaqyny bekitý tártibi kelesilerdi qamtıdy:

• Eń tómen jalaqy Úkimet tarapynan nemese arnaıy organ arqyly belgilenýi tıis.

• Jumysshylar men jumys berýshilerdiń ókilderi bul protseske qatysýy kerek.

• Belgilengen jalaqy mindetti túrde oryndalýǵa tıis jáne ony buzǵandarǵa shara qoldanylýy qajet.

- Osy rette, QR Úkimeti № 131 konventsııanyń erejelerine sáıkes 2024 jylǵy 20 naýryzda Halyqaralyq eńbek uıymynyń usynymdaryn eskere otyryp, eń tómen jalaqyny aıqyndaýdyń jańa ádistemesin ázirlep, bekitti. Ádistemege sáıkes, eń tómen jalaqy mólsheri eki kórsetkish – medıandyq jalaqy jáne eńbek ónimdiligi negizinde anyqtalady. Bul tásil áleýmettik ádilettilik pen eń tómen jalaqynyń belgilengen deńgeıiniń ekonomıkalyq negizdiligi arasyndaǵy tepe-teńdikti qamtamasyz etýge múmkindik beredi. Osylaısha, ulttyq normalyq-quqyqtyq aktiler qaralyp otyrǵan konventsııanyń talaptaryna sáıkestendirildi. Sonymen birge, elimizde eń tómen jalaqyny Úkimet jyl saıyn belgileıdi jáne ol eńbek zańnamasynda mindetti norma retinde qarastyrylǵanyn da atap ótken jón, - dedi depýtat.

Elimiz tarapynan № 131 konventsııany ratıfıkatsııalaý:

- eń tómen jalaqyny aıqyndaýǵa Qazaqstannyń qoldanystaǵy tásilderin halyqaralyq deńgeıde bekitýge;

- áleýmettik dıalogtyń quqyqtyq bazasyn nyǵaıtýǵa;

- HEU-ǵa múshelik aıasynda Qazaqstannyń halyqaralyq mindettemelerge beıildiligin rastaýǵa múmkindik beredi.

- Sondaı-aq, elimizde jumysshylardyń ádiletti jalaqy alýǵa degen quqyǵyn qamtamasyz etip, kedeılikpen kúresýge jáne laıyqty eńbek jaǵdaılaryn ornatýǵa jol ashady. Zańnyń qabyldanýy teris saıası, quqyqtyq, qarjy-ekonomıkalyq jáne ózge de saldarlarǵa alyp kelmeıdi, - dedi senator.

Budan buryn habarlanǵandaı, bıyl qyrkúıek aıynda Parlament Májilisi eń tómengi jalaqyny belgileý týraly zańdy qabyldady.