Senat Elbasynyń usynymymen Joǵarǵy sottyń eki sýdıasyn bosatyp, jańadan sýdıalar taǵaıyndady

ASTANA. QazAqparat - Búgin QR Parlamenti Senatynyń jalpy otyrysynda palata depýtattary QR Prezıdentiniń usynymy boıynsha QR Joǵarǵy sotynyń eki sýdıasyn laýazymynan bosatý, sondaı-aq QR Joǵarǵy sotynyń sýdıalaryn saılaý týraly qaýly qabyldady. Eske sala keteıik, QR Konstıtýtsııasyna sáıkes, QR Prezıdentiniń usynysy boıynsha QR Joǵarǵy sotynyń sýdıalaryn qyzmetinen bosatý Senattyń erekshe qaraýyna jatady.

QR Prezıdenti Senatqa QR Joǵarǵy sotynyń sýdıalary Elena Aqmoldaevany jáne Vladımır Borısovty ornynan túsýine baılanysty qyzmetinen bosatýdy, sonymen qatar basqa qyzmetke aýysýyna baılanysty TMD Ekonomıkalyq sotynyń sýdıasy Venera Seıtimovany qyzmetinen bosatý týraly usynym jasaǵan bolatyn. Buǵan qosa, QR Joǵarǵy sotynyń sýdıalary qyzmetine Abaı Rahmetýlındi jáne Beıbit Shermuhametovty taǵaıyndaý usynylady.

Aıta keteıik, sýdıa E.Aqmoldaevany qyzmetten bosatýǵa óziniń ótinish berýi negiz bolyp otyr. Al sýdıa V.Borısov jasyna baılanysty qurmetti demalysqa ketýine oraı laýazymynan bosatylatyn bolady.

Sonymen qatar TMD Ekonomıkalyq sotynyń sýdıasy V.Seıtimova basqa jumysqa aýysýyna baılanysty qyzmetinen bosatylatyn bolady.

Al bosatylǵandardyń ornyna Joǵarǵy sot sýdıalaryna usynylǵan kandıdatýralar sot salasynyń tájirıbeli qyzmetkerleri bolyp tabylady. Usynylǵandardyń sýdıalyq eńbek ótili jetkilikti, joǵary bilikti jáne tájirıbesi mol qyzmetkerler bolyp otyr. Atap aıtqanda, Abaı Jambyluly Rahmetýlın 1965 jyly týǵan, Qazaq memlekettik ýnıversıtetin «Quqyqtaný» mamandyǵy boıynsha bitirgen. Ol advokattyq qyzmetten bastap, aýdandyq jáne oblystyq sot sýdıalaryna deıingi qyzmet laýazymdaryn atqarǵan. Al Beıbit Bekmuhametuly Shermuhametov 1962 jyly týǵan. Uzaq jyldar boıy prokýratýra organdarynda, sot júıesinde túrli basshylyq qyzmetter atqarǵan.