Senat Elbasynyń usynýymen Joǵarǵy Sot sýdıalaryn qyzmetten bosatty
ASTANA. 16 mamyr. QazAqparat - Búgin Qazaqstan Respýblıkasy Parlamenti Senatynyń jalpy otyrysynda palata depýtattary QR Joǵarǵy Sotynyń sýdıalary Altynaı Baımuratova, Ǵalııa Maqajanova, Amangeldi Rysqalıev, Ibragım Toqbolatov jáne Aısulý Shaıkenovany qyzmetinen bosatý týraly Qazaqstan Prezıdentiniń usynymyn qarady.
Otyrysta sondaı-aq Joǵary Sot Keńesiniń usynymyna negizdelgen Nurııa Sısenova, Janna Volkova, Aıgúl Qydyrbaevany Joǵarǵy Sottyń sýdıalary etip taǵaıyndaý týraly Qazaqstan Respýblıkasy Prezıdentiniń usynysy qabyldandy.
Memleket basshysynyń usynysyn jarııalaǵan QR Joǵarǵy Sot Keńesiniń tóraǵasy - QR Prezıdenti Ákimshiligi basshysynyń orynbasary Talǵat Donaqovtyń aıtýynsha, bosatylatyn sýdıalardyń barlyǵy zeınetkerlik jasqa jetken. Olar sot júıesinde qyzmet atqarǵan ýaqytta ózderin joǵary bilikti, tájirıbeli qyzmetker retinde tanytqan.
Al Joǵarǵy Sot sýdıalaryna usynylǵan kandıdatýralar tájirıbeli qyzmetkerler bolyp tabylady. Olardyń úsheýi sýdıa qyzmetin atqaryp kelgen. Usynylǵandardyń barlyǵy da sýdıalyq eńbek ótili jetkilikti, joǵary bilikti jáne tájirıbesi mol qyzmetkerler bolyp tabylady.
Senat Memleket basshysynyń QR Joǵarǵy Sot sýdıalaryn ornynan bosatý jáne saılaý týraly usynymyn qoldap, arnaıy qaýly qabyldady. Jıyn barysynda Senat spıkeri Qaırat Mámı qyzmetinen bosatylǵan sýdıalarǵa palata atynan rızashylyǵyn bildirip ótti. «Olar táýelsiz Qazaqstan tarıhyndaǵy ádil sot bıligin júzege asyrý jolynda ózderiniń qyzmetin abyroımen atqardy. Bolashaqta jınaqtaǵan mol tájirıbeni elimizdegi jas sýdıalardy tárbıeleýge jumsaıtyndyqtaryńyzǵa senimdimin», dedi Qaırat Mámı.
