Senat Elbasynyń synyna oraı zań sapasyna meılinshe mán bermek
ASTANA. QazAqparat - Qasym-Jomart Toqaevtyń tóraǵalyq etýimen Senat Bıýrosynyń otyrysy ótti. Tóraǵa óz sózinde Palata qyzmetindegi birqatar uıymdastyrý máselelerin jarııa etti.
Atap aıtqanda, Senattyń kadrlyq ózgeristerden keıin Q.Toqaev Parlamenttiń joǵarǵy Palatasy Tóraǵasynyń orynbasarlary arasyndaǵy mindetterdi bólý týraly Ókimge qol qoıǵan bolatyn. Bektas Beknazarovqa zańnamalyq qyzmetti júzege asyrýǵa baılanysty, onyń ishinde Senattyń jumys josparyn ázirleý jáne turaqty komıtetterdiń zań jobalarymen jumysyn uıymdastyrý máselelerin úılestirý júkteldi.
Odan basqa, Beknazarov Reglament jáne depýtattyq etıka jónindegi komıssııanyń múshesi bolyp tabylady. Tóraǵa orynbasarynyń qatysýymen komıssııa jumysy jalǵasa beredi. Sergeı Gromov Senattyń máslıhattarmen ózara is-qımyly, depýtattyq toptardyń qyzmeti, senatorlardyń aımaqtarǵa sapary, sondaı-aq qarjy-sharýashylyq qyzmetin úılestirý máselelerimen aınalysady.
Senat Tóraǵasy zań jobalarymen jumys barysynda Reglamenttiń talaptaryn qatań saqtaý qajettigine Bıýro músheleriniń nazaryn aýdardy. «Árbir zań jobasyn jan-jaqty talqylap, olardyń sapasyna aıryqsha mán berip baıypty sheshim qabyldaý - bizdiń basty mindetimiz. Elbasy qabyldanǵan keıbir zańdardyń sapasyna qatysty ádil syn aıtqan bolatyn. Senattyń zańdardy qabyldap Elbasynyń qol qoıýyna usynýy senatorlarǵa asa jaýapty mindet júkteıtinin tereń sezinýimiz qajet», - dedi Q.Toqaev.
Bıýroda Palatanyń 29 qyrkúıekte bolatyn kezekti otyrysynyń kún tártibi kelisildi. Senatorlar «1994 jylǵy 15 sáýirdegi Uly Otan soǵysynyń qatysýshylary men múgedekterine, basqa memleketterdiń aýmaǵyndaǵy urys qımyldaryna qatysýshylarǵa, qaza tapqan áskerı qyzmetshilerdiń otbasylaryna arnalǵan jeńildikter men kepildikterdi ózara taný týraly kelisimge ózgerister men tolyqtyrýlar engizý týraly hattamany ratıfıkatsııalaý týraly» jáne «Qazaqstan Respýblıkasynyń Úkimeti men Serbııa Respýblıkasynyń Úkimeti arasyndaǵy Tabys pen kapıtalǵa salynatyn salyqtarǵa qatysty qosarlanǵan salyq salýdy boldyrmaý jáne salyq salýdan jaltarýǵa jol bermeý týraly konventsııany jáne oǵan Hattamany ratıfıkatsııalaý týraly» zań jobalaryn qaraıdy.
Bıýro Qaýlysy boıynsha Májilisten túsken zań jobalary bólinip berildi. Áleýmettik-mádenı damý jáne ǵylym komıtetine «Halyqaralyq ǵylymı-tehnıkalyq ortalyqtyń qyzmetin jalǵastyrý týraly kelisimdi ratıfıkatsııalaý týraly» zań jobasy berildi. Halyqaralyq qatynastar, qorǵanys jáne qaýipsizdik komıteti «Qazaqstan Respýblıkasy men Tájikstan Respýblıkasy arasyndaǵy Strategııalyq áriptestik týraly shartty ratıfıkatsııalaý týraly» zań jobasy boıynsha bas komıtet bolyp belgilendi.
Otyrysta 2016 jylǵy qazanda elimizde bıologııalyq alýan túrliliktiń saqtalýyn zańnamalyq qamtamasyz etýdiń ózekti máselelerine arnalǵan parlamenttik tyńdaý ótkizý týraly sheshim qabyldandy. Agrarlyq máseleler, tabıǵatty paıdalaný jáne aýyldyq aýmaqtardy damytý komıteti tyńdaýdy uıymdastyrýǵa jaýapty bolyp belgilendi. Sondaı-aq qazanda jol qozǵalysy salasyndaǵy quqyqtyq retteý máseleleri jónindegi tyńdaý ótkizý belgilendi, ony Konstıtýtsııalyq zańnama, sot júıesi jáne quqyq qorǵaý organdary komıteti uıymdastyratyn boldy.
«Parlamenttik tyńdaýlar qabyldanǵan zańdardyń iske asyrylý barysy týraly jan-jaqty jáne tolyq aqparat alyp, túıindi máselelerdi tereń zerdeleýge múmkindik beredi, - dedi Q.Toqaev. - bul Palatalardyń Konstıtýtsııada belgilengen quqyǵy, osy múmkinshilikti aldaǵy kezeńde keńinen qoldanýymyz qajet».
Odan basqa, Bıýro senatorlardy halyqaralyq parlamenttik uıymdarǵa jáne Parlament Senatynyń shet memleketter parlamentterimen yntymaqtastyq jónindegi toptaryna jiberý týraly Qaýly qabyldady.
