Senat el óńirlerin suıytylǵan gazben qamtamasyz etýge arnalǵan qujatty maquldady
«Keıingi kezde elimizde suıytylǵan munaı gazyna degen ishki suranysty qamtamasyz etý máselesi erekshe ózekti boldy. Osyǵan baılanysty suıytylǵan munaı gazynyń aınalymyn retteý jónindegi qoldanystaǵy zańnamany jetildirý maqsatynda Parlament depýtattarynyń bastamasymen búgin qarastyrylyp otyrǵan Zań ázirlendi. Birinshiden, jetkizý jospary aıasynda suıytylǵan munaı gazyn bólshek saýdada ótkizýdiń shekti baǵalaryn memlekettik retteý belgilenedi. Bul rette, jetkizý jospary boıynsha taýarlyq gazdy nemese suıytylǵan munaı gazyn ótkizetin tulǵalar úshin belgilengen shekti baǵadan asyp ketýge jol bermeý týraly mindetteme bekitiledi», - dedi senator Súıindik Aldashev.
Sonymen qatar ol ónimdi jetkizý jospary aıasynda suıytylǵan munaı gazyn bólý tetigi ózgeretinin aıtty. Bul turǵyda Energetıka mınıstrligi tıisti aqparattyq júıe arqyly ózi aıqyndaıtyn tártippen jetkizý josparyn qalyptastyrady. Al jergilikti atqarýshy organdar Energetıka mınıstrligi aıqyndaıtyn tártippen jetkizý jospary boıynsha bólingen suıytylǵan gaz kólemin bólýdi bekitedi. Suıytylǵan munaı gazyn óndirýshiler men menshik ıeleri suıytylǵan gazdyń jetkizý josparyn oryndaýǵa jáne bólingen kólemin taratýǵa mindetti. Jetkizý jospary aıasynda ótkiziletin suıytylǵan munaı gazyn satyp alý quqyǵy gaz toltyrý stantsııalary men pýnktteriniń, toptyq rezervýarlyq qondyrǵylardyń, avtogaz quıý stantsııalarynyń ıelerinde, sondaı-aq ónerkásiptik tutynýshylarda bolady.
«Suıytylǵan gazdy óndirýshiler úshin suıytylǵan gazdy tek óziniń quıý estakadalary arqyly kóterme satýdy júzege asyrý mindeti belgilenedi. Bul rette, tıisti ınfraqurylymdy daıyndaýdy talap etetin bul norma 2024 jylǵy 1 shildeden bastap qoldanysqa engiziledi. Suıytylǵan gazdy satyp alý quqyǵy bar tulǵalar úshin de tıisti shekteýler belgilenedi. Osy rette bir gaz toltyrý stantsııasyn bir ýaqytta eki jáne odan da kóp tulǵanyń paıdalanýyna tyıym salynady. Budan basqa, gaz toltyrý stantsııalary men pýnktteriniń ıeleri úshin suıytylǵan gazdy saqtaý, quıý jónindegi óndiristik keshender obektilerin úshinshi tulǵalarǵa berý múmkindigi alynyp tastalady», - dedi depýtat.
Budan bólek ol turmystyq ballondardy paıdalaný kezinde qaýipsizdikti qamtamasyz etý maqsatynda olarǵa gaz quıý tek gaz toltyrý stantsııalary men pýnktterinde ruqsat etiletinin aıtty.
Óz kezeginde Senat tóraǵasy Máýlen Áshimbaev zań gaz jáne gazben jabdyqtaý salasynda týyndaǵan qoǵamdyq qatynastardy qosymsha retteý úshin ázirlengenin aıtty.
«Qujattaǵy erejeler suıytylǵan gazben jabdyqtaý júıesiniń ashyqtyǵyn qamtamasyz etedi. Zań aıasynda kondomınıým obektisin basqarýdyń jekelegen máselelerin retteýge arnalǵan normalar da bar. Aldaǵy ýaqytta zań osy saladaǵy máselelerdi oń sheshýge yqpal etedi dep senemiz», – dedi Senat tóraǵasy.
