Senat eksporttyq aǵyndardy baqylaýǵa qatysty qujatty maquldady
ASTANA. KAZINFORM – Búgin Senattyń jalpy otyrysynda «Eýrazııalyq ekonomıkalyq odaqtyń kedendik aýmaǵynan áketiletin taýarlardyń shyǵarylǵan jerin aıqyndaýdyń úılestirilgen júıesi týraly kelisimdi ratıfıkatsııalaý týraly» Zań maquldandy.
Qarastyrylǵan kelisimniń maqsaty - taýarlardy Eýrazııalyq ekonomıkalyq odaqtyń kedendik aýmaǵynan áketý kezinde olardyń shyǵý tegin anyqtaý, kýálandyrý jáne rastaý tásilderin sáıkestendirý úshin quqyqtyq negizdi qamtamasyz etý.
- Kelisimde taýarlardyń shyǵý tegin anyqtaýdyń biryńǵaı belgileri aıqyndaldy. Elde tolyǵymen óndirilgen taýarlarǵa paıdaly qazbalar, ósimdik sharýashylyǵy, mal sharýashylyǵy ónimderi, sondaı-aq elektr ári jylý energııasy jáne basqalar jatady. Bul rette, jýý, býyp-túıý jáne qarapaıym jınaqtaý operatsııalary sııaqty taýardyń shyǵý tegine áser etpeıtin operatsııalardyń tizbesi aıqyndaldy, - dedi senator Álibek Náýtıev.
Ashyqtyqty qamtamasyz etý maqsatynda atalǵan sharalardyń biryńǵaı tizilimin júrgizý ókilettigi Eýrazııalyq ekonomıkalyq komıssııaǵa beriledi.
Sondaı-aq, qujat aıasynda ýákiletti jáne tekserýshi organdardyń fýnktsııalary aıqyndalady. Óndiristik úı-jaılardy ınspektsııalaýdy jáne eksporttaýshylardyń kommertsııalyq qujattamasyn tekserýdi qosa alǵanda, tekserýler júrgizý tártibi belgilenedi. Budan basqa, Kelisimde elektrondyq verıfıkatsııa júıelerin jasaý arqyly rásimderdi tsıfrlandyrý máseleleri rettelgen. Bul úshinshi elderdiń quzyretti organdaryna sertıfıkattardyń túpnusqalyǵyn naqty ýaqyt rejıminde jedel tekserýge múmkindik beredi, ıaǵnı osy qadamdar qazaqstandyq taýarlardyń syrtqy naryqtarǵa qoljetimdiligin aıtarlyqtaı jeńildetedi.
- «Atameken» Ulttyq kásipkerler palatasynyń derekterine sáıkes, 2025 jyly Qazaqstanda 118 myńǵa jýyq eksporttyq sertıfıkat berildi. Bul rette, onyń 35%-dan astamy tamaq ónerkásibine, 21%-y metallýrgııaǵa jáne 16,5%-y aýyl sharýashylyǵyna tıesili. Bul salalar úshin Kelisimde óndirýshini taýardy qaıta oraý nemese jýý sııaqty «qarapaıym operatsııalarmen» aınalysatyndardan bólý kózdeledi. Ol óz kezeginde syrtqy naryqtarda «Made in Kazakhstan» brendin qorǵaýǵa múmkindik beredi. Kelisimniń taǵy bir mańyzdy tarmaǵy tsıfrlandyrýǵa qatysty. Elimizde buǵan negiz qurylǵan deýge bolady, ıaǵnı «Atameken» Ulttyq kásipkerler palatasy ótinimderdi berýdi jáne qorytyndylardy qalyptastyrý sharalaryn tolyq elektrondyq formatqa aýystyrdy, - dedi deptat.
Kelisimdi ratıfıkatsııalaý eksporttyq aǵyndardy baqylaýdyń úılestirilgen tetigin qurýdy qamtamasyz etedi, Eýrazııalyq ekonomıkalyq odaqtyń ishki naryǵyn qorǵaýǵa múmkindik beredi jáne syrtqy ekonomıkalyq qyzmettiń senimdi qatysýshylary úshin qolaıly jaǵdaılar jasaıdy.
Buǵan deıin EAEO erkin saýda aımaǵyn keńeıte bastaǵanyn jazǵan edik.