Senat EKSPO-2017 halyqaralyq kórmesin uıymdastyrý jáne ótkizýge arnalǵan zań jobasyn maquldady
ASTANA. 21 qarasha. QazAqparat - Búgin Parlament Senatynyń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine Astana EKSPO-2017 halyqaralyq mamandandyrylǵan kórmesin uıymdastyrý jáne ótkizý boıynsha ózgerister men tolyqtyrýlar engizý týraly» zań jobasyn birinshi oqylymda maquldady.
Eske salsaq, EKSPO sııaqty aýqymdy memlekettik jobany jedel iske asyrý qajettigine baılanysty, Memleket basshysy atalǵan zań jobasyn Parlamentte shuǵyl qaraýdy jarııalaǵan bolatyn.
Zań jobasy Astana qalasynda EKSPO-2017 halyqaralyq mamandandyrylǵan kórmesin uıymdastyrý jáne ótkizý úshin qolaıly jaǵdaı jasaý, tıisti ınfraqurylymdy salýǵa ınvestıtsııa tartý, kórmege kelýshiler men qatysýshylardyń qaýipsizdigin qamtamasyz etý, jańa ınnovatsııalyq tehnologııalar engizý, týrıstik salany damytý sekildi mańyzdy dúnıelerdi qamtıdy.
«Zań jobasynda kórme uıymdastyrýdy jáne ótkizýdi júzege asyratyn uıymdar úshin jeńildikter, kórme nysandaryna qatysty sáýlet, qala qurylysy qyzmetin júzege asyrýdyń ońtaılandyrylǵan tártibi kózdeledi. Sheteldik standarttardy qoldaný múmkindigi qarastyrylady. Usynylǵan zań jobasynda segiz zańnamalyq aktige túzetýler engizý kózdelgen, onyń ishinde eki kodeks bar - bıýdjet kodeksi jáne salyq kodeksi», - dedi QR Ekonomıka jáne bıýdjettik josparlaý mınıstri Erbolat Dosaev. Atap aıtqanda, Bıýdjet kodeksine Nazarbaev Ýnıversıteti sııaqty Ulttyq kompanııany bıýdjetten nysanaly salym túrinde jedel qarjylandyrý úshin jaǵdaılar jasaıtyn ózgerister engiziledi. Budan bólek, zań jobasynda Ulttyq kompanııaǵa qatysty korporatıvtik tabys salyǵy, jer salyǵy jáne múlik salyǵy boıynsha «salyqtyq bosańsytýdy» qamtıtyn Salyq kodeksine túzetýler engiziledi. Sonymen qatar, jańa jáne energııa saqtaıtyn tehnologııalardyń elementterimen álemdik aýqymdaǵy nysandaryn jobalaý jáne salý boıynsha aýqymdy tájirıbesi bar shetel mamandaryn tartý rásimin ońaılatý maqsatynda, «Halyqty jumyspen qamtý týraly» Zańǵa osy mamandardy kvotadan tys tartýǵa múmkindik beretin túzetýler engiziledi. «Halyqaralyq kórmeler bıýrosynyń EKSPO ınfraqurylymynyń qurylysyn 2016 jyldyń sońyna deıin aıaqtaý jónindegi talaptaryn oryndaý qarastyrylady», - deıdi mınıstr. Zań jobasy ekinshi oqylymda búgin qaralady dep josparlanyp otyr.
