Senat ekologııaǵa qatysty qujatty Májiliske qaıtardy

Zańmen Qazaqstan Respýblıkasynyń Jer, Orman Kásipkerlik, Ekologııalyq jáne Sý kodeksterine, sondaı-aq Qazaqstan Respýblıkasynyń 7 zańyna ózgeris pen tolyqtyrýlar engiziledi.

- Zańda ekologııalyq salany tsıfrlandyrý, qaldyqtardy basqarý jáne qaıtalama resýrstardy qaıta óńdeý júıesin jetildirý, klımattyq retteý tetikteri men kómirtegi ofsetin damytý, Ulttyq gıdrometeorologııalyq qyzmettiń jumysyn jetildirý, sondaı-aq ekologııalyq retteý men baqylaýdyń tıimdiligin arttyrý jónindegi sharalar kózdeledi. Zańmen memlekettik ekologııalyq saraptama men qoǵamdyq tyńdaýlar ótkizýge qatysty jekelegen erejeler naqtylanady, - dedi senator Sultan Dúısembınov.

Zań aıasynda mynalarǵa baǵyttalǵan normalar kózdeledi:

- ınvestıtsııalyq jobalar men kómirsýtekterdi barlaý jónindegi jobalar úshin ekologııalyq ruqsattar men qorytyndylar alý merzimderin qysqartý (teńizde kómirsýtekterdi barlaýdy qospaǵanda);

- qaldyqtardy basqarý jáne qaıtalama resýrstardy qaıta óńdeý júıesin jetildirý;

- kommýnaldyq qaldyqtardy jınaý, suryptaý jáne kómý oryndaryn uıymdastyrý boıynsha jergilikti atqarýshy organdardyń ókilettikterin bekitý;

- kıik derıvattaryn satý júıesiniń operatoryn anyqtaý jáne olardy iske asyrý tártibin retteý;

- Parıj kelisiminiń 6-babynyń klımattyq qarjylandyrý tetikterin engizý jáne naryqtyq tetikterdi iske asyrý tártibin retteý.

- Zańdy ekinshi oqylymǵa daıyndaý barysynda Senattyń Agrarlyq máseleler, tabıǵatty paıdalaný jáne aýyldyq aýmaqtardy damytý komıteti Qazaqstan Respýblıkasynyń ulttyq úlesin oryndaý maqsatynda Parıj kelisiminiń naryqtyq tetikteri negizinde iske asyrylatyn jobalardyń nátıjelerin esepke alý tártibin retteıtin QR Ekologııalyq kodeksiniń jańa 288-1-babynyń erejelerin qosymsha qarady. Múddeli memlekettik organdardyń qatysýymen ótken talqylaýdyń qorytyndysy boıynsha komıtet halyqaralyq klımattyq qarjylandyrýdy tartý jáne klımattyq jobalardyń ınvestıtsııalyq tartymdylyǵyn arttyrý úshin neǵurlym qolaıly jaǵdaılar jasaý maqsatynda kórsetilgen baptyń 6-tarmaǵyn túzetý qajettigi týraly qorytyndyǵa keldi, - dedi depýtat.

Osy oraıda senatorlar zańnyń jeke babyn maquldamaı, bul baptyń jańa redaktsııasyn usyna otyryp, ony Májiliske qaıtarý týraly sheshim shyǵardy.

Eske salsaq, 18 maýsymda Senat «Qazaqstan Respýblıkasynyń keıbir zańnamalyq aktilerine ekologııa jáne ekonomıkanyń jekelegen salalaryn jetildirý máseleleri boıynsha ózgerister men tolyqtyrýlar engizý týraly» Zańdy birinshi oqylymda maquldady.