Senat EAEO jáne Qytaımen taýar aınalymyn arttyrýǵa negizdelgen zań qabyldady

NUR-SULTAN. QazAqparat - Búgin QR Parlamenti Senatynyń jalpy otyrysynda «Bir taraptan Eýrazııalyq ekonomıkalyq odaq pen oǵan múshe memleketter jáne ekinshi taraptan Qytaı Halyq Respýblıkasy arasyndaǵy saýda-ekonomıkalyq yntymaqtastyq týraly kelisimdi ratıfıkatsııalaý týraly» Zańy qabyldandy, dep habarlaıdy QazAqparat tilshisi.

Kelisim Eýrazııalyq ekonomıkalyq odaqqa múshe memleketter men Qytaı arasyndaǵy ózara saýdany jaqsartýǵa jaǵdaı jasaıdy. Bul qujat ózara saýdada kedendik bajdardy joıýdy jáne tómendetýdi kózdemeıdi.

«Kelisimniń erejeleri ózara saýdada qoldanylatyn tehnıkalyq retteý rásimderin, sanıtarııalyq jáne fıtosanıtarııalyq sharalardy jeńildetýge múmkindik beredi. Sondaı-aq onda kedendik yntymaqtastyq, zııatkerlik menshik quqyqtaryn qorǵaý máseleleri qamtylǵan. Іshki naryqty qorǵaý sharalaryn qoldaný jáne beriletin sýbsıdııalar týraly aqparat almasý kózdelgen. Kelisimde elektrondyq saýda salasynda tutynýshylardyń quqyqtaryn jáne olardyń derbes derekterin qorǵaý kózdeledi. Taraptar ózara saýdany shekteýi múmkin sharalar týraly habarlamalarmen aldyn ala almasýǵa ýaǵdalasty», - dedi QR Ulttyq ekonomıka mınıstri Rýslan Dálenov.

Onyń sózine qaraǵanda, EAEO memleketteri men Qytaı arasyndaǵy ózara is-qımyldy odan ári damytýǵa qarqyn berý maqsatynda salalyq yntymaqtastyqty damytýdyń negizgi baǵyttary kózdelgen. Bul aýyl sharýashylyǵy, energetıka, kólik, ónerkásiptik kooperatsııa, tehnologııalar men ınnovatsııalar, qarjy jáne qorshaǵan orta. Osy baǵyttarda yntymaqtastyqty tereńdetý elderdiń ınnovatsııalyq belsendiligin, ınvestıtsııalyq tartymdylyǵyn jáne básekege qabilettiligin arttyrýǵa yqpal etedi.

Kelisim boıynsha taraptar ulttyq zańnamaǵa sáıkes josparlanyp otyrǵan saýdany retteý sharalary týraly aqparatty jarııalaıdy. Bul suraýlar jiberýge jáne konsýltatsııalar júrgizýge múmkindik beredi. Qytaı Qazaqstan úshin mańyzdy saýda áriptesteriniń biri. Sondyqtan sharttyq bazany damytý elder arasyndaǵy saýda-ekonomıkalyq yntymaqtastyqty nyǵaıtýǵa múmkindik beredi. Zań jobasyn iske asyrý respýblıkalyq bıýdjetten qarajat bólýdi talap etpeıdi, teris áleýmettik-ekonomıkalyq jáne quqyqtyq saldarǵa ákep soqtyrmaıdy», - dedi mınıstr.