Senat EAEO týraly shartqa túzetýler engizý týraly Zańdy qarady
NUR-SULTAN. QazAqparat – Parlament Senatynda «2014 jylǵy 29 mamyrdaǵy Eýrazııalyq ekonomıkalyq odaq týraly shartqa Qyrǵyz Respýblıkasynyń qosylýyna baılanysty oǵan ózgerister engizý týraly hattamany ratıfıkatsııalaý týraly» QR Zańyn qabyldady, dep habarlaıdy QazAqparat.
«Qyrǵyzstan 2014 jyly 23 jeltoqsanda qol qoıylǵan Qyrǵyz Respýblıkasynyń qosylýy týraly shart sheńberinde Eýrazııalyq ekonomıkalyq odaq týraly shartqa qosyldy. Ony odaqqa múshe barlyq memleketter ratıfıkatsııalady jáne 2015 jyly 12 tamyzda Qyrǵyzstan odaqtyń tolyq quqyly múshesi boldy. Odaqqa múshe memleketterdiń aýmaǵy boıynsha Qyrǵyzstan tarapynan elektr energııasyn memleketaralyq berý ózara qarym-qatynastaryn retteý sheńberinde hattama ázirlendi. Onyń maqsaty Qyrǵyz Respýblıkasynyń shartqa qosylýyna baılanysty odaq elderi arasynda elektr energııasyn memleketaralyq berýdi júzege asyrý ádisnamasyn aıqyndaý bolyp tabylady», - dedi QR Energetıka vıtse-mınıstri Qaırat Rahymov Senattyń búgingi otyrysynda.
Onyń aıtýynsha, hattama jobasy 2017 jyly 13 qańtarda Eýrazııalyq ekonomıkalyq odaq keńesiniń ókimimen maquldanǵan. Hattamany ratıfıkatsııalaý, baǵa belgileý men tarıftik saıasat negizderin qosa alǵanda, elektr energetıkasy salasyndaǵy tabıǵı monopolııalar sýbektileri qyzmetterine qol jetkizý týraly hattamaǵa Qyrǵyz Respýblıkasynyń qosylýyn eskere otyryp, odaqqa múshe memleketterdiń energııa jelileriniń tıimdi jumys isteý múmkindigin qamtamasyz etedi.
Sondaı-aq, vıtse-mınıstr Qyrǵyzstanda elektr energııasyn ımporttaý qajettiligi ondaǵy sý elektr stantsııalary ornalasqan ózenderdegi aǵynnyń azaıýyna baılanysty týyndaǵanyn túsindirdi.
«Hattamany Armenııa, Belarýs, Qyrǵyzstan jáne Reseı elderi ratıfıkatsııalaıdy. Zań jobasyn qabyldaý teris áleýmettik-ekonomıkalyq jáne ózge de saldarǵa ákep soqpaıdy. Memlekettik bıýdjetten qosymsha shyǵystardy talap etpeıdi», - dedi vıtse-mınıstri.
