Senat: EAEO pen Vetnam arasyndaǵy erkin saýda týraly kelisim qabyldandy
ASTANA. QazAqparat - Búgin Parlament Senatynyń jalpy otyrysynda «Bir taraptan Eýrazııalyq ekonomıkalyq odaq pen oǵan múshe memleketter jáne ekinshi taraptan Vetnam Sotsıalıstik Respýblıkasy arasyndaǵy erkin saýda týraly kelisimdi ratıfıkatsııalaý týraly» Zań qabyldandy.
Qujat endi Memleket basshysynyń qol qoıýyna joldanady.
Kelisim Eýrazııalyq ekonomıkalyq odaq elderi men Vetnam arasyndaǵy saýda baılanystaryn damytýǵa jáne nyǵaıtýǵa baǵyttalady. Bul óz kezeginde taýarlardy ózara ilgeriletý men ózara ınvestıtsııalar tartý úshin qolaıly jaǵdaılar týǵyzýǵa múmkindik beredi. Qujat aıasynda taýarlardyń kópshiligi boıynsha Eýrazııalyq ekonomıkalyq odaq elderi men Vetnam arasynda bajsyz saýda rejımi belgilenedi. Keıbir taýarlar boıynsha ózara saýdada ımporttyq kedendik bajdy joıý jóninde ótpeli kezeń de aıqyndalyp otyr. Al sezimtal taýarlar boıynsha ózara saýdada ımporttyq kedendik bajdy qoldaný múmkindigi de saqtalǵan.
Budan bólek, kelisim zııatkerlik menshik nysandaryna quqyqtardy qorǵaý boıynsha taraptardyń mindeti bekitilgen. Básekelestikti qorǵaýdyń biryńǵaı qaǵıdattary belgilenip, qatysýshy elderdiń kedendik qyzmetteriniń, memlekettik organdarynyń, tehnıkalyq, sanıtarııalyq jáne fıtosanıtarııalyq retteý úshin jaýaptylardyń arasyndaǵy tyǵyz yntymaqtastyqtyń negizin qalaıtyn bolady.
