Senat EAEO ortaq elektr energetıkalyq naryǵyn qalyptastyrý jónindegi zań qabyldady

NUR-SULTAN. QazAqparat – Senat depýtattary «2014 jylǵy 29 mamyrdaǵy Eýrazııalyq ekonomıkalyq odaq týraly shartqa ortaq elektr energetıkalyq naryǵyn qalyptastyrý bóliginde ózgerister engizý týraly hattamany ratıfıkatsııalaý týraly» Zań jobasyn qabyldady, dep habarlaıdy QazAqparat tilshisi.

Qujattyń jobasyn depýtattarǵa Energetıka vıtse-mınıstri Jandos Nurmaǵanbetov tanystyrdy.

«Eýrazııalyq ekonomıkalyq odaqtyń ortaq elektr energetıkalyq naryǵyn Armenııa, Belarýs, Qazaqstan, Qyrǵyzstan jáne Reseıdiń ulttyq elektr energııasy naryqtaryn ıntegratsııalaý jolymen qalyptastyrý josparlanýda.

Atalǵan mindetti Joǵary ekonomıkalyq keńestiń sheshimderin iske asyrý úshin: 2015 jylǵy 8 mamyrda Odaqtyń ortaq elektr energetıkalyq naryǵyn qalyptastyrý tujyrymdamasy bekitildi», - dedi mınıstdiń orynbasary.

Onyń aıtýynsha, atalmysh tujyrymdama Eýrazııalyq ekonomıkalyq odaq aıasyndaǵy ortaq elektr energetıkalyq naryǵynyń maqsattary men mindetterin, onyń nysanaly modelin, basqarý qurylymdaryn, naryq sýbektileriniń ózara is-qımyl tetikterin, retteýdiń nysandary men ádisterin aıqyndaıdy, sondaı-aq naryqty qalyptastyrý kezeńderin qamtıdy.

«Baǵdarlama uıymdastyrýshylyq, zańnamalyq jáne tehnologııalyq is-sharalar keshenin, onyń ishinde jedel kelisimsharttar boıynsha jáne bir táýlikke alǵa ortaq naryqta saýdanyń elektrondyq júıesin, aqparat almasý júıesin ázirleý jónindegi is-sharalardy qamtıdy, sondaı-aq ortaq elektr energetıkalyq naryqty retteıtin aktiler júıesin daıyndaýdy kózdeıdi.

Ulttyq naryqtardyń erekshelikterin eskere otyryp, taraptar Eýrazııalyq ekonmıkalyq odaqtyń ortaq naryǵyn qalyptastyrý kezinde qoldanystaǵy ulttyq elektr energetıkalyq naryqtardy, onyń ishinde qýat naryqtaryn saqtaý jóninde kelisimge qol jetkizdi», - dedi Jandos Nurmaǵanbetov.

Onyń aıtýynsha, odaqtyń ortaq elektr energetıkalyq naryǵyn qalyptastyrýdyń, onyń jumys isteýi men damýynyń mynadaı qaǵıdattary kózdelgen:

1) teń quqylyq, ózara tıimdilik jáne múshe memleketterdiń kez-kelgenine ekonomıkalyq zalal keltirmeý negizindegi yntymaqtastyq;

2) elektr energııasyn óndirýshiler men tutynýshylardyń ekonomıkalyq múddeleriniń teńgerimin saqtaý;

3) naryqtyq qatynastarǵa jáne adal básekelestikke negizdelgen tetikterdi basym paıdalaný;

4) elektr energetıkasy salasyndaǵy tabıǵı monopolııalar sýbektileriniń kórsetiletin qyzmetterine kedergisiz qol jetkizýdi qamtamasyz etý;

5) múshe memleketterdiń qatar jumys isteıtin elektr energetıkalyq júıeleri negizinde Odaqtyń ortaq elektr energetıkalyq naryǵyn kezeń-kezeńimen qalyptastyrý jáne damytý;

6) múshe memleketterdiń energetıkalyq qaýipsizdigin eskere otyryp, múshe memleketter sýbektileri arasynda elektr energııasynyń saýdasyn júzege asyrý.

Senat depýtattary zań jobasyn týr qabyldaý týraly sheshim shyǵardy.