Senat EAEO Kedendik tarıfteri týraly zań jobasyn qaraıdy
Senatorlar «2014 jylǵy 29 mamyrdaǵy Eýrazııalyq ekonomıkalyq odaq týraly shartqa Armenııa Respýblıkasynyń qosylýy týraly 2014 jylǵy 10 qazandaǵy shartqa ózgerister engizý týraly hattamany ratıfıkatsııalaý týraly» zań jobasyn qaraıtyn boldy. Qujat Eýrazııalyq ekonomıkalyq odaqtyń Biryńǵaı kedendik tarıfterin tolyq ımplementatsııalaýǵa deıin kedendik bajdardyń tómendetilgen mólsherlemelerin qoldanýda Armenııa Respýblıkasyna ótpeli kezeńdi 1 jyl merzimge uzartý jónindegi ýaǵdalastyqtardy iske asyrý úshin ázirlengen bolatyn.
Otyrystyń kún tártibine «2014 jylǵy 29 mamyrdaǵy EAEO týraly shartqa Qyrǵyz Respýblıkasynyń qosylýyna baılanysty Qyrǵyz Respýblıkasynyń 2014 jylǵy 29 mamyrdaǵy EAEO týraly shartty, Eýrazııalyq ekonomıkalyq odaqtyń quqyǵyna kiretin jekelegen halyqaralyq sharttardy jáne EAEO organdarynyń aktilerin qoldanýy jónindegi jaǵdaılar men ótpeli erejeler týraly 2015 jylǵy 8 mamyrdaǵy hattamaǵa ózgerister engizý týraly hattamany ratıfıkatsııalaý týraly» zań jobasy da engizildi.
Qujat EAEO biryńǵaı kedendik tarıfterin tolyq ımplementatsııalaýǵa deıin kedendik ákelý bajdarynyń mólsherlemelerin qoldanýda Qyrǵyzstan úshin ótpeli kezeńin uzartýǵa baǵyttalǵan. Zań jobasynda Qyrǵyzstan aýmaǵyna úshinshi elderden ákelinetin keıbir taýarlarǵa qatysty kedendik-tarıftik salany retteý qamtylǵan.
Bıýro músheleri sondaı-aq turaqty Májilisten kelip túsken birqatar zań jobalaryn komıtetterge bólip berdi.