Senat EAEO Keden kodeksi týraly shartqa ózgerister engizetin zańdy talqylaıdy
ASTANA. KAZINFORM – Búgin Senattyń jalpy otyrysynda depýtattar Eýrazııalyq ekonomıkalyq odaqtyń Keden kodeksi týraly shartqa ózgerister engizetin zańdy talqyǵa salady.
22 qyrkúıekte Senat Spıkeri Máýlen Áshimbaevtyń tóraǵalyǵymen ótken palata bıýrosynyń otyrysynda depýtattar búgingi otyrysynyń kún tártibin belgilegen edi. Soǵan sáıkes senatorlar «2017 jylǵy 11 sáýirdegi Eýrazııalyq ekonomıkalyq odaqtyń Keden kodeksi týraly shartqa ózgerister engizý týraly hattamany ratıfıkatsııalaý týraly» zańdy qaraıdy.
Aıta keterligi, bul zańdy Májilis osy jyldyń maýsym aıynda qabyldaǵan bolatyn. Sol kezde qujat boıynsha negizgi baıandama jasaǵan Premer-mınıstrdiń orynbasary – Ulttyq ekonomıka mınıstri Serik Jumanǵarın 2023 jylǵy 25 jeltoqsanda Sankt-Peterbýrg qalasynda ótken Joǵary Eýrazııalyq ekonomıkalyq keńestiń otyrysynda memleketterdiń basshylary syrtqy elektrondyq saýdany retteý bóliginde Eýrazııalyq ekonomıkalyq odaqtyń Keden kodeksi týraly shartqa ózgerister engizý týraly hattamaǵa qol qoıǵanyn atap ótti. Onyń málimetinshe, atalǵan hattamada kelesideı ózgerister qarastyrylǵan:
- halyqaralyq poshta arqyly shet eldik ınternet-platformalardan úshinshi elderden jeke tulǵalardyń atyna jiberiletin taýarlardy bólek sanatqa – elektrondyq saýda taýarlaryna bólý;
- «elektrondyq saýda operatory» uǵymyn engizý;
- elektrondyq saýda deklaratsııasy degen jańa túrdegi keden deklaratsııasyn engizý.
- Qazirgi tańda shet eldik ınternet-platformalardan satyp alynatyn taýarlar jeke paıdalanýǵa arnalǵan taýarlar sanatyna jatady. Sonymen birge, erkin kirgizý normasynan asqan jaǵdaıda deklaratsııalanady. Osyǵan baılanysty, atalǵan taýarlar resmı statıstıkaǵa engizilmeıdi, sebebi saýda aınalymyna jatpaıdy. Elektrondyq saýda taýarlarynyń barlyq kólemin deklaratsııalaý shet eldik ınternet-platformalardan satyp alynatyn taýarlar týraly tolyq statıstıkany qurýǵa múmkindik beredi, - degen edi Serik Jumanǵarın.
Esterińizge sala ketsek, munyń aldyndaǵy Senat otyrysynda depýtattar «Qazaqstan Respýblıkasynyń keıbir zańnamalyq aktilerine ınnovatsııalyq qyzmet salasyn memlekettik qoldaý júıesin jetildirý jáne memlekettik statıstıka máseleleri boıynsha ózgerister men tolyqtyrýlar engizý týraly» zańdy eki oqylymda qarap, maquldady.
Zańnyń maqsaty — ınnovatsııalyq qyzmetti memlekettik qoldaý júıesin odan ári jetildirý jáne jańa tehnologııalar engizý men Qazaqstan ekonomıkasynyń básekege qabilettiligin arttyrý úshin qolaıly jaǵdaılar jasaý. Senattyń Ekonomıkalyq saıasat, ınnovatsııalyq damý jáne kásipkerlik komıtetiniń málimetine qaraǵanda, osy qujat 2 Kodekske jáne 10 zańǵa ózgerister men tolyqtyrýlar engizýdi kózdeıdi.
Astana Hub halyqaralyq tehnologııalyq parki men «Innovatsııalyq tehnologııalar parki» derbes klasterlik qoryn Astana Hub derbes klasterlik qoryna biriktirý aıasynda uǵymdyq apparatty sáıkestikke keltirý, sondaı-aq Qordyń fýnktsııalaryn jáne ınnovatsııalyq qyzmetti qoldaý quraldaryn ońtaılandyrý bóliginde jáne basqa da túzetýler engizildi.
- Zań elimizdegi ınnovatsııalyq qyzmet salasyn memlekettik qoldaý júıesin jáne memlekettik statıstıkany odan ári jetildirý maqsatymen ázirlengen. Túzetýler aıasynda biryńǵaı ınnovatsııalyq klaster qurý kózdelip otyr. Osyǵan baılanysty «Astana Hub» pen «Innovatsııalyq tehnologııalar parki» klasterlik qoryn biriktirý jáne olardyń qatysýshylary úshin biryńǵaı quqyqtyq orta qurý qarastyryldy. Qujatta ınnovatsııalyq qyzmetti damytý úshin qolaıly jaǵdaı jasaýǵa qajetti ózge de sharalar qamtylǵan. Zańnyń qabyldanýy otandyq ınnovatsııalyq salanyń damýyna jáne el ekonomıkasynyń ilgerileýine tyń serpin beredi dep senemiz, – dedi Senat tóraǵasy Máýlen Áshimbaev.
Kún tártibine shyǵarylǵan máseleler qaralyp bolǵannan keıin senatorlar Memleket basshysynyń «Jasandy ıntellekt dáýirindegi Qazaqstan: ózekti máseleler jáne ony túbegeıli tsıfrlyq ózgerister arqyly sheshý» atty Joldaýynda aıtylǵan bastamalardy iske asyrýǵa arnalǵan depýtattyq saýaldaryn joldady. Atap aıtqanda, Janbolat Jórgenbaev óńirlerde qaıta óńdeý kásiporyndarynyń jetispeýshiligine jáne áleýmettik mańyzy bar azyq-túlik taýarlarynyń baǵasyn turaqtandyrý tetikteriniń tıimdiligin jetildirýge qatysty máselelerge nazar aýdardy. Osyǵan oraı ol bul problemalardy sheshýge arnalǵan birqatar naqty sharany atap ótti. Al Bıbigúl Aqqojına Úkimetke «Jastar tájirıbesi» jáne «Alǵashqy jumys orny» baǵdarlamalaryna qatysýshylardyń jalaqysyn kóterýdi usyndy. Senator bul baǵytta ınflıatsııa mólsherin jáne turǵylyqty jerine baılanysty eń tómengi kúnkóris deńgeıin eskerý qajet ekenin aıtty.