Senat EAEO-da ǵylymı dárejeler týraly qujattardy ózara tanýǵa qatysty zańdy maquldady
ASTANA. KAZINFORM – Búgin Senattyń jalpy otyrysynda «Eýrazııalyq ekonomıkalyq odaqqa múshe memleketterde ǵylymı dárejeler týraly qujattardy ózara taný týraly kelisimdi ratıfıkatsııalaý týraly» Zańy maquldandy.
Kelisimge sáıkes fılosofııa doktory (PhD), beıini boıynsha doktor, ǵylym kandıdaty jáne ǵylym doktory sııaqty ǵylymı dárejeler týraly qujattar rastaýsyz tanylady. Mundaı qujattardyń ıeleri ǵylymı dárejesi úshin ústemeaqy talap etken jaǵdaıda erekshelik qarastyrylǵan. Sondaı-aq zań normalary ǵylymı kadrlarmen almasýdy yntalandyrýǵa jáne EAEO-ǵa múshe elderdiń bilim berý júıelerin ıntegratsııalaýǵa, ýnıversıtetter men zertteý ınstıtýttary arasyndaǵy ǵylymı baılanystardy nyǵaıtýǵa arnalǵan.
«Zańnyń negizgi maqsaty - 2023 jylǵy 8 maýsymda Sochı qalasynda qol qoıylǵan Eýrazııalyq ekonomıkalyq odaqqa múshe memleketterdegi ǵylymı dárejeler týraly qujattardy ózara taný týraly kelisimdi ratıfıkatsııalaý. Bul kelisim EAEO-ǵa múshe memleketter azamattarynyń ǵylymı dárejelerin olardyń aýmaǵyndaǵy eńbek kóshi-qony aıasynda tanýdy kózdeıdi jáne bilim berý, ǵylym salalaryndaǵy yntymaqtastyqty nyǵaıtýǵa baǵyttalǵan. Qazirge deıin ǵylymı dárejeler týraly qujattardy taný úshin jumysqa ornalasatyn memlekettiń zańnamasynda belgilengen bilim týraly qujattardy taný rásimderin júrgizý talap etildi. Osy oraıda, Kelisim eńbek kóshi-qony aıasynda ǵylymı dárejeler týraly qujattardyń ıegerlerin olarǵa berilgen ǵylymı dárejelerge sáıkes jumysqa ornalasatyn memlekette kásibı qyzmetin júzege asyrý úshin ózara tanýǵa baılanysty suraqtardy retteıdi. Máselen, fılosofııa doktory (PhD), beıini boıynsha doktor, ǵylym kandıdaty jáne ǵylym doktory, ıaǵnı ǵylymı dárejeler týraly qujattardyń ıeleri ǵylymı dárejesi úshin jumysqa ornalasatyn memlekette belgilengen ústemeaqylardy talap etetin jaǵdaılardy qospaǵanda, ulttyq taný rásimderi júrgizilmeı, sáıkes dep tanylady», - dedi senator Altynbek Nýhuly.
Zań aıasynda ǵylymı dárejeler týraly qujattardyń túpnusqalylyǵyn tekserý jáne basqada rastaý máseleleri boıynsha aqparat almasýy reglamentteledi. Eńbek kóshi-qony sheńberinde azamattardyń ǵylymı dárejesin avtomatty túrde taný mehanızmderi qarastyrylǵan. Kelisim EAEO keńistiginde eńbek resýrstarynyń erkin qozǵalysyn qamtamasyz etý arqyly eńbek naryǵyn nyǵaıtýǵa baǵyttalǵan, sondaı-aq azamattardyń kásibı qyzmetine qol jetkizýge qolaıly jaǵdaılar jasaıdy.
«Qoryta aıtqanda, Zań - ǵylymı kadrlarmen almasýdy yntalandyrady jáne EAEO-ǵa múshe elderdiń bilim berý júıeleriniń ıntegratsııasyn qamtamasyz etedi, ýnıversıtetter men zertteý ınstıtýttary arasyndaǵy ǵylymı baılanystardy odan ári nyǵaıtýǵa múmkindik beredi. Zańnyń qabyldanýy teris saıası, quqyqtyq, qarjy-ekonomıkalyq jáne ózge de saldarlarǵa, sondaı-aq respýblıkalyq bıýdjetten qarjylyq shyǵyndarǵa alyp kelmeıdi», - dedi depýtat.
