Senat EAEO-da aýyl sharýashylyǵy ónimderiniń saýdasyna qatysty zańdy maquldady
ASTANA. KAZINFORM — Búgin Senattyń jalpy otyrysynda «Eýrazııalyq ekonomıkalyq odaq sheńberinde aýyl sharýashylyǵy ónimine arnalǵan qoımalyq kýálikterdi shyǵarý (berý), olardyń aınalysy jáne ótelý qaǵıdalary týraly kelisimdi ratıfıkatsııalaý týraly» Zańy maquldandy.
Kelisim 2023 jylǵy 31 shildede Máskeý qalasynda qol qoıylyp, Eýrazııalyq ekonomıkalyq odaq aıasynda aýyl sharýashylyǵy jáne ózara saýda salasyndaǵy yntymaqtastyqty damytýǵa, sondaı-aq aýyl sharýashylyǵy ónimderine arnalǵan qoıma kýálikterin paıdalanýǵa baǵyttalǵan.
«Qujat qoıma kýálikterin berý, aınalymǵa shyǵarý jáne EAEO sheńberinde olardy ótelýin retteıdi, olarǵa qoıylatyn talaptardy aıqyndaıdy. Kelisimge boıynsha qoıma kýálikteri shyǵarylatyn aýyl sharýashylyǵy ónimderiniń túrleri múshe elderdiń ulttyq zańnamasyna sáıkes anyqtalady. Odan bólek, EAEO-ǵa múshe memleketter qatysýshy eldiń qoıma kýálikteri týraly málimetterdi biryńǵaı ınternet-resýrs arqyly alýǵa múmkindik beretin júıeni qamtamasyz etýge mindettenedi», - dedi senator Zakırjan Kýzıev.
Qoımalardyń kýálikter boıynsha mindettemelerdi oryndaýyn qamtamasyz etý EAEO-ǵa múshe memlekettiń zańnamasyna sáıkes júzege asyrylady.
Eýrazııalyq ekonomıkalyq odaq memleketteri arasynda Kelisimdi júzege asyrý:
- qoıma kýálikteriniń turaqty aınalymyn qamtamasyz etýge, sondaı-aq olardyń ıelerine qarjylyq resýrstarǵa qol jetkizýin arttyrýǵa;
- aýyl sharýashylyǵy taýarlarynyń elektrondy saýdasyn damytýǵa;
- Qazaqstannyń qoıma kýálikterin Eýrazııalyq ekonomıkalyq odaq naryǵynda ilgeriletýge, qoıma kýálikteri kepilimen nesıe alý múmkindigin jasaýǵa jáne naryqtyń qolaıly jaǵdaıynda taýardy satý arqyly eldiń agrarlyq sektorynyń tabysyn arttyrýǵa yqpal etedi.
«Aıta ketý qajet, bul Kelisimniń negizine Qazaqstandaǵy astyq qolhattarynyń aınalymyn zańnamalyq retteý tájirıbesi qalandy. Jalpy, Kelisimdi iske asyrý memlekettik bıýdjetten qarjylyq shyǵyndardy talap etpeıdi jáne teris áleýmettik-ekonomıkalyq jáne quqyqtyq saldarǵa ákep soqpaıdy», - dedi depýtat.
Osyǵan deıin habarlaǵanymyzdaı, Parlament Májilisi «2025-2027 jyldarǵa arnalǵan respýblıkalyq bıýdjet týraly» Zańǵa Senat engizgen túzetýlermen kelisti.
