Senat EAEO aıasynda shyǵyndardy azaıtýǵa arnalǵan qujatty qabyldady
Atalǵan hattamaǵa 2019 jylǵy 1 qazanda Erevan qalasynda memleket basshylary qol qoıǵan bolatyn. Hattamamen Eýrazııalyq ekonomıkalyq odaq týraly sharttyń №5 jáne №8 qosymshalaryna ózgerister engizildi.
«Shart 2015 jylǵy 1 qańtardan bastap kúshine endi, al Eýrazııalyq ekonomıkalyq odaqtyń Keden kodeksi eki jyldan keıin, ıaǵnı 2017 jyly qabyldandy. Keden kodeksiniń normalaryna sáıkes avanstyq tólemder ınstıtýtyn engizý kózdelgen. Osyǵan baılanysty Shartqa tıisti túzetýler engizý qajettiligi týyndap otyr. Aldaǵy tólenetin kedendik tólemder men salyqtar, ósimpuldar men paıyzdar esebine engizilgen aqsha avanstyq tólem dep tanylady. Qazirgi ýaqytta kedendik tazartý kezinde birneshe kedendik tólemder men salyqtardyń túri bar», - dedi QR Qarjy mınıstri Erulan Jamaýbaev.
Onyń aıtýynsha, osy Hattamany ratıfıkatsııalaý syrtqy ekonomıkalyq qyzmetke qatysýshylarǵa ýaqytyn únemdep, shyǵyndaryn qysqartýǵa múmkindik beredi.
Atap aıtqanda:
- birinshiden, kedendik deklaratsııalaý úshin kedendik alymdy, kedendik bajdy, qosylǵan qun salyǵyn, aktsızdi, arnaıy, dempıngke qarsy jáne ótemaqy bajyn tóleý úshin birneshe tólem tapsyrmalaryn paıdalaný qajettiligine baılanysty shyǵyndardy barynsha azaıtýǵa múmkindik beredi;
- ekinshiden, qolda bar avanstyq tólemderdi kedendik bajdardy tóleý jónindegi mindetterdi oryndaýǵa paıdalanýǵa bolady;
- úshinshiden, syrtqy ekonomıkalyq qyzmetke qatysýshylar osy tólemderdi paıda bolǵan bereshekti óteýge jumsaı alady;
- tórtinshiden, bıýdjettik synyptama kodynyń árbir túri boıynsha aqsha qarajatynyń qaldyqtaryn jeke-jeke qadaǵalaý qajettiligi joıylady.
«Keden organy avanstyq tólemderdi engizgen tulǵanyń ótinishi boıynsha oǵan avanstyq tólemder retinde engizilgen aqsha qarajatynyń jumsalýy týraly esep beredi. Atalǵan Hattamany ratıfıkatsııalaý bizdiń elimiz úshin áleýmettik-ekonomıkalyq jáne quqyqtyq saldarǵa ákep soqtyrmaıdy jáne respýblıkalyq bıýdjetten qarajat bólýdi talap etpeıdi», - dedi mınıstr.