Senat EAEO aıasynda tutynýshylardyń quqyqtaryn qorǵaýǵa arnalǵan qujatty maquldady
ASTANA. KAZINFORM — Búgin Senattyń jalpy otyrysynda «2014 jylǵy 29 mamyrdaǵy Eýrazııalyq ekonomıkalyq odaq týraly shartqa ózgerister engizý týraly hattamany ratıfıkatsııalaý týraly» Zańy maquldandy.
«2023 jylǵy 25 mamyrda Máskeý qalasynda Eýrazııalyq ekonomıkalyq odaqqa múshe memleketterdiń basshylary hattamaǵa qol qoıdy. Bul - EAEO týraly shartqa usynylǵan úshinshi keshendi ózgerister jıyntyǵy. Eýrazııalyq ekonomıkalyq odaq týraly shartqa barlyǵy 32 túzetý engiziledi. Túzetýler tehnıkalyq retteýge, sanıtarlyq, veterınarlyq-sanıtarlyq jáne karantındik fıtosanıtarlyq sharalarǵa, tutynýshylardyń quqyqtaryn qorǵaýǵa, tarıftik emes retteýge, básekelestikke, memlekettik satyp alýǵa qatysty», - dedi senator Arman Óteǵulov.
Shartqa engiziletin túzetýlerge toqtalsaq, Eýrazııalyq ekonomıkalyq odaqtyń (EAEO) karantındik obektileriniń biryńǵaı tizbesine engizilmegen zııandy organızmderge qatysty shuǵyl fıtosanıtarııalyq sharalardy múshe memleketterdiń engizý múmkindigi eskerilgen. Osy rette múshe memleket bul týraly Eýrazııalyq ekonomıkalyq komıssııany, EAEO-nyń basqa memleketterin habardar etedi jáne kedendik aýmaqta osyndaı sharany engizý týraly usynys jasaıdy.
«Ekinshiden, ulttyq elektrondyq tsıfrlyq qoltańbalardy ózara taný normalary engiziledi. Bul elektrondyq formatta ótkiziletin satyp alýlarǵa qatysýdy qamtamasyz etedi, sondaı-aq elderimiz arasyndaǵy saýda-ekonomıkalyq baılanystardy nyǵaıtady jáne taýar óndirýshilerimizdiń eksportqa shyǵý múmkindikteri artady. Qazirgi kezde Eýrazııalyq ekonomıkalyq odaq týraly shartta múshe elder memlekettik satyp alýǵa qatysý úshin ulttyq zańnamaǵa sáıkes daıyndalǵan elektrondyq tsıfrlyq qoltańbalardy ózara tanıtyny jarııalanǵan. Osyǵan baılanysty bul qaǵıdalardy bekitýge Komıssııa Keńesine tıisti quzyretti berý kózdelgen. Qaǵıdalardy qabyldaýǵa Komıssııa Keńesiniń ókilettikteriniń bolmaýyna baılanysty osy túzetýlerdi engizý qajeti týyndady. Úshinshiden, Eýrazııalyq úkimetaralyq keńeske tutynýshylardyń quqyqtaryn qorǵaý úshin múshe memleketterdiń birlesken is-qımyl baǵdarlamasyn bekitý quqyǵy beriledi. Bul tutynýshylardyń quqyqtaryn qorǵaýdyń ortaq tásilderin ázirleý úshin qajet», - dedi depýtat.
Onyń aıtýynsha, taýarlardy ákelý/áketý kezinde ruqsat qujattaryn alý protsesi jeńildetiledi. Qazir lıtsenzııa berý erejeleri Eýrazııalyq ekonomıkalyq odaq týraly shartta jazylǵan. Olardy túzetý qıyndyq týdyrady. Erejeni Komıssııa Keńesimen bekitý usynyldy. Erejede ruqsat qujattaryn alý rásimderin ońaılatý qarastyrylǵan.
«Eýrazııalyq odaq aıasynda ekonomıkalarymyz ushtasyp, taýar aınalymy kópjaqty sıpatqa ıe bolyp otyr. Ýaqyt óte kele tehnologııalar damyp, adam aǵzasyna zııany bolýy múmkin qozǵaǵyshtar da túrlenip, halyqtyń azyq-túlik qaýipsizdigin qamtamasyz etý - memleketterden ýaqtyly shara qabyldaýdy talap etedi. Osy máselerde tájirıbe almasý arqyly ortaqtasa qabyldanǵan sheshimderdiń tıimdiligi joǵary bolady dep senemin», - dedi senator.
