Senat EAEO aýqymynda naryqtardaǵy básekelestikke qatysty qujatty qabyldady
«Hattama EAEO-nyń qoldanystaǵy quqyǵyndaǵy olqylyqtardy joıýdy, sondaı-aq Sharttyń jekelegen erejelerin naqtylaýǵa arnalǵan túzetýlerdi kózdeıdi. Atalǵan túzetýler negizgi úsh bloktan turady. Birinshiden, básekelestik salasyndaǵy ózgerister. Bul transshekaralyq naryqtardaǵy básekelestiktiń jalpy qaǵıdalarynyń buzylýyna jol bermeý úshin eskertý berýdi jáne aldyn ala eskertý shyǵarýdy qarastyrady», - dedi QR Saýda jáne ıntegratsııa mınıstri Baqyt Sultanov.
Ózgeristerdiń ekinshi blogy Eýrazııalyq ekonomıkalyq komıssııaǵa energetıka, tehnıkalyq retteý, makroekonomıka, básekelestik jáne veterınarııa salalarynda qosymsha ókilettikter berýdi kózdeıdi.
Bul ókilettikter Eýrazııalyq ekonomıkalyq odaq aıasynda qol qoıylǵan halyqaralyq sharttardyń, onyń ishinde Eýrazııalyq ekonomıkalyq odaq týraly sharttyń saldary bolyp sanalady. Jalpy, qosymsha ókilettikter Komıssııa qyzmetiniń ashyqtyǵyn qamtamasyz etýge baǵyttalǵan. Mysaly, Tehnıkalyq retteý salasynda Komıssııa Keńesine múshe memleketterdi akkredıtteý jónindegi organdardyń ózara salystyrmaly baǵalaýdy júzege asyrý tártibin bekitý boıynsha ókilettikter beriledi.
Sondaı-aq, Komıssııanyń ókilettikteri Shartta kózdelgen, biraq olardy iske asyrý tártibi rettelmegen jaǵdaılar boıynsha qoldanystaǵy normalardy naqtylaýǵa baǵyttalǵan túzetýler de bar.
«Úshinshiden, tehnıkalyq túzetýler eskerilgen. Eýrazııalyq ekonomıkalyq odaq aıasynda taraptardyń turaqty praktıkalyq ózara is-qımyly normalardy neǵurlym tolyq jáne durys qoldaný maqsatynda Sharttyń jekelegen bólikterin túzetý qajettigin anyqtady. Bul negizinen olqylyqtardy joıýǵa jáne Eýrazııalyq ekonomıkalyq odaq týraly shart erejeleriniń redaktsııasyn naqtylaýǵa baǵyttalǵan tehnıkalyq sıpattaǵy túzetýler», - dedi mınıstr.
