Senat Dúnıejúzilik bank qarajatyna qatysty qujatty maquldady
ASTANA. KAZINFORM — Búgin Senattyń jalpy otyrysynda «Bir taraptan Qazaqstan Úkimeti jáne ekinshi taraptan Halyqaralyq qaıta qurý jáne damý banki, Halyqaralyq qarjy korporatsııasy men Investıtsııalar kepildiginiń Kópjaqty agenttigi arasyndaǵy Qazaqstannyń ornyqty damýyna jáne órkendeýine járdemdesý maqsatynda yntymaqtastyqty keńeıtý jónindegi áriptestik týraly negizdemelik kelisimdi ratıfıkatsııalaý týraly» Zań maquldandy.
Negizdemelik kelisimde mynadaı negizgi baǵyttar boıynsha yntymaqtastyq kózdeledi:
— ekonomıkanyń makroekonomıkalyq jáne fıskaldyq ornyqtylyǵyn arttyrý;
— ınfraqurylymdy jańǵyrtý;
— aýyl sharýashylyǵy sektoryn damytýǵa járdemdesý;
— shaǵyn jáne orta bıznesti qarjylandyrýǵa qoljetimdilikti jaqsartý;
— áleýmettik sektorlarǵa, onyń ishinde densaýlyq saqtaý men bilim berýge ınvestıtsııalardy ulǵaıtý;
— ınnovatsııalyq jáne tsıfrlyq damý;
— energııa tıimdiligin jáne klımattyń ózgerýine tózimdilikti arttyrý.
Dúnıejúzilik Bank toby qarjylandyratyn jobalardy iske asyrý Qazaqstannyń jalpy ishki óniminiń ósýine, kásipkerliktiń damýyna oń áser etedi, qosymsha jumys oryndaryn qurýǵa, ınvestıtsııalyq ahýaldy jaqsartýǵa, ınnovatsııalardy, sondaı-aq úzdik halyqaralyq tájirıbelerdi engizýge yqpal etetin bolady.
— Búginde elimiz, ózderińizge belgili bolǵandaı Dúnıejúzilik bank tobymen 30 jyldan astam jumys istep, kólik, bilim berý, ekologııa, tsıfrlandyrý, qarjy salalarynda 50-den astam joba iske asyryldy. Eger onyń keıbirin atap ótetin bolsaq, eń aýqymdy jobalardyń qatarynda kólik ınfraqurylymy jobalary bar. Elimizde osyndaı jobalardy tıimdi ári jedel iske asyrýdy qamtamasyz etý maqsatynda Dúnıejúzilik Bankpen strategııalyq ózara is-qımyldy jańartý qajettiligi týyndap otyr. Osyǵan baılanysty zań aıasynda qarastyrylyp otyrǵan Negizdemelik kelisimge ótken jylǵy 18 maýsymda Astanada qol qoıylǵan. Ol Dúnıejúzilik bankpen strategııalyq yntymaqtastyqtyń jańa kezeńiniń bastalýyna, sondaı-aq jobalardy tıimdi ári jedel júzege asyrýdy qamtamasyz etý qajettigine oraı jasalǵan, — dedi senator Sultanbek Mákejanov.
Aıta keteıik, jaqynda Premer-mınıstrdiń orynbasary — Ulttyq ekonomıka mınıstri Serik Jumanǵarın Dúnıejúzilik bank toby elimizde qandaı jobalarǵa qarjy salatynyn aıtty.
