Senat "Dinı qyzmet jáne dinı birlestikter týraly" QR zańyn qabyldady

QR Din isteri agenttiginiń tóraǵasy Qaırat Lama Sharıftiń atap ótýinshe, zań jobasynyń aldyna úsh negizgi mindet qoıylǵan. Olar: adam quqyqtaryn qorǵaý, dinı birlestikterdiń qyzmetin retke keltirý jáne ony azamattyq zańnamaǵa sáıkestendirý, zańnamadaǵy kemshin tustardy tolyqtyrý. «Zań jobasynda Qudaıǵa qulshylyq etý, dinı joralar, rásimder men jınalystar qajettilik týyndaǵan jaǵdaıda ǵıbadat úılerinde jáne olarǵa bólingen aýmaqta, qulshylyq etý oryndarynda, dinı birlestikterdiń mekemelerinde, zırattarda, qoǵamdyq tamaqtaný oryndarynda, turǵyn úılerde eshbir kedergisiz júrgiziledi dep aıqyn kórsetildi»,-dedi Agenttik tóraǵasy.

Onyń atap ótýinshe, sondaı-aq zań jobasynda mıssıonerlik qyzmetke erekshe nazar aýdarylǵan. QR aýmaǵynda qyzmet etetin mıssıonerler, Din isteri agenttiginiń aýmaqtyq departamentterinde jyl saıyn qaıta tirkeýden ótýi jáne atalǵan qyzmetti júzege asyrýshy tulǵalar tirkeýden ótý barysynda qajetti qujattar men materıaldardy usynýǵa mindetti.

«Osy zań qabyldanǵannan keıin barlyq dinı birlestikter qaıta tirkeýden ótýi qajet. Sol kezeńde Din isteri agenttiginiń aldynda ákimdiktermen jáne ádilet organdarymen birlese otyryp, quryltaı qujattaryn muqııat zertteý arqyly dinı birlestiker men sany az dinı toptardy tirkeýge jáne olardyń qyzmetin retke keltirýge biregeı múmkindik týmaq»,-dedi Q. Lama Sharıf

Atalǵan zań jobasyn Senat depýtattary biraýyzdan maquldady.