Senat depýtaty S. Eskendirov S.Seıfýllın atyndaǵy QazATÝ Túlekteri klýbynyń tóraǵasy bolyp saılandy
ASTANA. 12 sáýir. QazAqparat - QR Parlamenti Senatynyń depýtaty Samat Eskendirov S.Seıfýllın atyndaǵy Qazaq agrotehnıkalyq ýnıversıtetiniń Túlekter klýbynyń tóraǵasy bolyp saılandy, áriptesi Sergeı Kýlagın onyń orynbasary boldy.
2012 jyldyń 9 sáýiri kúni S.Seıfýllın atyndaǵy Qazaq agrotehnıkalyq ýnıversıtetinde «QazATÝ túlekteri klýbynyń» músheleri bas qosyp, klýb jumysyn jetildirý máselesin talqylady. Oǵan Vladımır Gartman, Tasbaı Sımambaev, Samat Eskendirov, Jańbyrshy Núrkenov Jumataı Súıindikov, Temirjan Hamıtov, Ivan Saýer sııaqty ýnıversıtettiń kóptegen túlekteri, elge belgili tulǵalar qatysty. Al, QR Parlamenti Senatynyń depýtaty Sergeı Kýlagın men SQO ákimi Serik Bilálovtiń ókilderi keldi.
Rektor Aqylbek Kúrishbaev burynǵy túlekterge oqý ǵımarattary men zerthanalardy aralap kórsetip, ýnıversıtettiń damý josparymen tanystyrdy. Sonymen qatar, stýdentterdiń áleýmettik jaǵdaılaryn jaqsartý úshin klýb músheleriniń qarjylaı qoldaýy qajettigin aıtyp, ol qarajattyń naqty qaıda jumsalatyndyǵy týraly aqparat berdi.
Máselen, áleýmettik jaǵdaıy tómen otbasylardan shyqqan stýdentterge materıaldyq járdem kórsetip, oqý aqylaryn tóleýge kómek berý kerektigi aıtyldy. Sondaı-aq, stýdenttik emhanany ashý, 480 oryndyq saýyqtyrý keshenine qarjylaı qoldaý kórsetý, ata-ananyń qamqorlyǵynan aıyrylǵan 72 stýdentke kómek berý, úzdik oqıtyn áleýmettik jaǵdaılary tómen otbasylardan shyqqan balalarǵa jáne 35 sportshy stýdentke Túlekter klýbynyń granttaryn bólý usynyldy.
Ýnıversıtet basshysynyń bul usynystary «QazATÝ túlekteri klýbynyń» músheleri tarapynan tolyǵymen qoldaý tapty.
Túlekterdiń kezdesýi barysynda, sondaı-aq klýbtyń jańa tóraǵasy saılandy. Qatysýshylardyń biraýyzdan qoldaýymen QR Parlamenti Senatynyń depýtaty (ýnıversıtettiń 1990 jylǵy túlegi) Samat Eskendirov qoǵamnyń tóraǵasy boldy. Onyń orynbasarlary bolyp Vladımır Gartman men Sergeı Kýlagın saılandy.
