Senat depýtaty: Referendým - bılik pen halyq arasyndaǵy alshaqtyqty joıýdyń joly

NUR-SULTAN. QazAqparat – 5 maýsymda Qazaqstanda jalpyhalyqtyq referendým ótedi. Búgin atalǵan saıası sharaǵa qatysty úgit-nasıhat, túsindirý jumystarynyń sońǵy kúni. Osy oraıda referendým men onyń mańyzdylyǵyna qatysty QR Parlamenti Senatynyń depýtaty Nurlan Beknazarov oıymen bólisti, dep habarlaıdy QazAqparat tilshisi.

«Prezıdent referendým ótetini týraly jarııalaǵannan keıin depýtattar óńirlerdi aralap, 1 aı boıy halyq arasynda túsindirý jumystaryn ótkizdik. Konstıtýtsııaǵa qatysty saıası ózgerister men reforlamalardy biz 2017 jyly qolǵa aldyq. 2019 jyly ózgerister men reformalar jalǵasyn tapty. 5 maýsymda jalpyhalyqtyq referendým ótedi, sondyqtan onyń jóni men mańyzy bólek. Referendým - bılik pen halyq arasyndaǵy alshaqtyqty joıýdyń joly. Memleket basshysy halyqqa arnalǵan ár joldaýynda saıası reformalardyń mańyzdylyǵy týraly únemi aıtady. Osy oraıda referendýmnan kútetin úmit zor», - dedi Nurlan Beknazarov elordadaǵy Eýrazııa ulttyq ýnıversıtetiniń jurtshylyǵymen kezdesý barysynda.

Senat depýtatynyń aıtýynsha, bılik pen halyq arasynda ózara senimniń bolýy eldiń odan ári damýy úshin mańyzdy. Bul oraıda halyq elde bolyp jatqan saıası reformalar men ózgeristerge belsene aralasyp, óz únin jetkizgeni jón.

«Sol sııaqty memlekettiń saıası jáne ekonomıkalyq turǵydan ilgerileı túsýine ishki jaǵdaımen qatar syrtqy jaǵdaıda áser etedi. Sońǵy ýaqytta álemdegi geosaıası jaǵdaı asa máz emes, ony ózderińiz bilip otyrsyzdar. Alpaýyt elderdiń ózi teńselip jatyr. Budan bólek, pandemııanyń saldary áli tolyq joıylǵan joq. Sondaı-aq, bıylǵy Qańtar oqıǵasynan da habarlaryńyz bar. Joǵary atalǵan jaıttardyń barlyǵy ár memleketke belgili bir deńgeıde áserin tıgizedi. Jahandyq jáne ishki saıası jaǵdaılar el taǵdyryna qatysty mańyzdy sheshimderdi dál qazir qabyldaý kerektigin kórsetip otyr. Óz elimizge kelsek, Memleket basshysy saıası sheshimderdi ýaqytyly qabyldap jatyr. 5 maýsymda ótetin referendým sonyń kýási», - deıdi ol.

Sondaı-aq, halyq qalaýlysy qazaqstandyqtar referendýmǵa qatysqanda «daýys berýim kerek» dep qana emes, onyń mańyzdylyǵyna mán berý kerektigin tilge tıek etti.

Aıta ketsek, búgin elordadaǵy L. Gýmılev atyndaǵy Eýrazııa ulttyq ýnıversıtetinde «Konstıtýtsııalyq reformalardyń jańa Qazaqstan úshin mańyzdylyǵy» atty jıyn ótti.

Atalǵan sharaǵa Senat depýtaty, atalǵan joǵary oqý ornynyń oqytýshylary men belsendi jastary qatysty.