Senat depýtaty Kólik mınıstrliginen «Batys Eýropa-Batys Qytaı» jobasyna qatysty esep berýdi surady
ASTANA. 21 sáýir. QazAqparat /Qanat Mámetqazyuly/ - Kólik jáne kommýnıkatsııa mınıstrligi «Batys Eýropa-Batys Qytaı» jobasy boıynsha Parlament aldynda esep berse ıgi.
Búgin QR Parlamenti Senatynyń jalpy otyrysynda «Japonııa Halyqaralyq yntymaqtastyq agenttigi men Qazaqstan Respýblıkasynyń Úkimeti arasyndaǵy Kólik dálizin (Jambyl oblysy) qaıta jańartý jobasy boıynsha Qaryz týraly kelisimdi ratıfıkatsııalaý týraly» zań jobasyn talqylaý barysynda senator Qýanysh Aıtahanov osylaı málim etti.
«Kezinde batys pen shyǵysty jalǵap jatqan Jibek jolyn qazirgi zamanǵa saı qaıta jańǵyrtý, elimizdi halyqaralyq saýda jolynyń úlken dálizine aınaldyrý - Elbasynyń alǵa qoıǵan mańyzdy strategııalyq maqsattarynyń biri. «Batys Eýropa-Batys Qytaı» halyqaralyq dálizin salýǵa baılanysty parlament sońǵy eki jylda birneshe mıllıardtaǵan dollardy quraıtyn kelisimsharttardy qabyldady. Endeshe osy baǵytta jumystar qalaı oryndalyp jatyr? Qarajat ıgerilmeı jatqan sekildi. 2012 jyly bitedi dep josparlanǵan ýchaskeler 2013 jylǵa sozylyp, Elbasynyń bergen tapsyrmasy oryndalmaı jatqan tárizdi dep túsinip otyrmyn», - dedi Q. Aıtahanov. Senator dáliz jobasy boıynsha jer telimderiniń ýaqytynda satyp alynbaǵanyna alańdaýshylyq ta bildirdi. «Úkimette birneshe márte osy másele qaraldy. Sodan beri jergilikti atqarýshy organ mınıstrlikke siltese, mınıstrlik jergilikti ákimdikke silteıdi. Bul asa mańyzdy jobany júzege asyrýǵa kedergi bolyp otyr. Sondyqtan, Kólik jáne kommýnıkatsııa mınıstrligi Parlament aldynda da esep berý kerek shyǵar», - dedi senator.
