Senat depýtaty elimizdegi mańyzdy dárilerdiń tapshylyǵyna alańdaýly

ASTANA. QazAqparat - Halyq dárihanalardaǵy ómirlik mańyzy bar dárilerdiń tapshylyǵyna baılanysty tıisti preparattardy ala almaı otyr. Bul týraly Senattyń jalpy otyrysynda depýtat Aqmaral Álnazarova aıtty, dep habarlaıdy QazAqparat tilshisi.

Depýtat baǵany retteýdegi qazirgi tetikterdiń saldarynan bólshek saýdadaǵy áleýmettik mańyzy bar laıyqty baǵadaǵy dárilerdiń túri qysqaryp, keıbir generık túrleriniń baǵasy tipti túpnusqadan da joǵary ekenin atap ótti.

Sonymen qatar, emdeýge arnalǵan dári-dármek pen isikke qarsy, endokrınologııalyq, epılepsııaǵa qarsy preparattardyń, sondaı-aq ómirlik mańyzdy jáne basqa toptaǵy dárilerdiń bolmaýy alańdatyp otyr. Bul tıimdiliktiń tómendeýine jáne emdeý barysyndaǵy úzilisterge, sondaı-aq retsıdıvterge ákeledi.

«Jalpy, bul másele memlekettiń erekshe nazar aýdarýyn qajet etedi. Halyqty ómirlik mańyzy bar preparattarmen jetkilikti kólemde qamtamasyz etý úshin otandyq óndirýshilerdiń el ishinde, onyń ishinde sýbsıdııalaý tetikteri arqyly olardyń óndirisin jolǵa qoıý máselesin sheshý qajet. Bul turǵyda ómirlik mańyzdaǵy dári-dármekterdiń tizimi anyqtalýy tıis. Mundaı tizimder búginde álemniń 137 elinde jasalyp otyr. Bul óz kezeginde saladaǵy basymdyqtardy anyqtaýǵa, sondaı-aq osy preparattarǵa neǵurlym tıimdi baǵa belgileý úshin mańyzy asa zor», - dedi Aqmaral Álnazarova Úkimet basshysy Álıhan Smaıylovtyń atyna joldaǵan saýalynda.