Senat depýtaty bolashaq urpaqtyń ǵalamat jaýapkershiligi týraly aıtty
ASTANA. QazAqparat - Memleket basshysy Nursultan Nazarbaevtyń qatysýymen ótken Táýelsizdik kúnine arnalǵan saltanatty shara kezinde QR Parlament Senatynyń depýtaty Aqan Bıjanov egemendik - búgingi urpaq pen keleshek urpaqtyń jaýapkershiligi degen oıyn aıtty.
«Barshańyz biletindeı, respýblıkamyz memlekettik táýelsizdigin jarııalaǵan tustan bastap, dúnıege alǵash ret qazaq ultynyń atymen atalatyn jańa memleket paıda boldy. Álemde halqynyń sany áldeqaıda basym, biraq jeke memlekettigi joq ulttardyń da bar ekenin bilemiz. Endeshe, egemen eldigimiz zor baqyt qana emes, sonymen qatar, búgingi jáne keler urpaq aldyndaǵy ǵalamat jaýapkershilik», - deıdi depýtat.
Senat depýtaty atap ótkendeı, «keńestik respýblıkalar arasyndaǵy burynǵy san salaly baılanystar úzilip, ótpeli kezeńniń qıyndyqtary beleń alǵan sol shaqta abdyraǵan halyqty jasampazdyq isterge bastap, táýelsizdiktiń irgetasyn nyǵaıtý - ońaı mindet emes» edi.
«Sol kezde, prezıdentimiz búkil jaýapkershilikti moınyna alyp, Qazaqstan halqyn óz sońynan erte bildi. Prezıdenttiń talantty basshylyǵy men baıypty saıasaty arqyly osynaý tarıh úshin tym qysqa merzim sanalatyn 25 jyldyń ishinde esimi álemdik qaýymdastyqqa belgisiz bolyp kelgen respýblıkany joǵarǵy qarqynmen damyp otyrǵan, beıbitshilik saıasatymen dúnıejúzine tanylyp úlgergen memleketke aınaldyra aldy. Sóıtip, Elbasy Qazaqstan halqynyń artqan zor senimin úlken abyroımen aqtap shyqty»,-dedi sózin túıindegen depýtat.
