Senat depýtaty BQO-da jańa mekteptiń jumysymen tanysty
ORAL. QazAqparat - Búgin Senat depýtaty Erbolat Muqaev jumys saparymen Zelenov aýdanynda bolyp, aýyl halqynyń tynys-tirshiligimen tanysty, dep habarlaıdy «QazAqparat» HAA tilshisi.
Depýtat áýeli QR Táýelsizdiginiń 25 jyldyǵyna oraı Peremetnyı aýyldyq okrýgine qarasty Ozernyı eldi mekeninde jańadan salynǵan Kırov negizgi mektebinde boldy. Qazirgi kezde ishi-syrty birdeı jarqyraǵan ǵımaratta 44 shákirt bilim alyp, olarǵa 17 muǵalim sabaq berýde. Sondaı-aq mektep janyndaǵy «Balbóbek» shaǵyn ortalyǵynda 14 baldyrǵan tárbıelenýde.
Erbolat Muqaev sonymen qatar aýdan ortalyǵy Peremetnyı aýylynda ótken jyly kúrdeli jóndeýden ótkizilgen Peremetnyı mektebine at basyn tiredi. 1961 jyly salynǵannan beri jóndeý kórmegen atalmysh ǵımarat ta Táýelsizdik toıyna oraı qaıtadan iske qosylǵan bolatyn. Jańartylǵan mektepte ustazdardyń jumys jasaýy men oqýshylardyń jan-jaqty bilim alýy úshin barlyq jaǵdaı jasalǵan.
Jalpy, muǵalimder arasynda sportpen dostasqandar az emes. Muny aýdanda ótip jatqan dástúrli týrnırden de kórýge bolady. E.Muqaev jarysqa qatysýshylarǵa sáttilik tiledi.
«Keshe Terekti aýdanynda boldym. El ishinde jaqsy jańalyq-ózgerister bar eken, halyqtyń kóńili kóterińki. Biz osy jolǵy saparymyz barysynda basqa da aýdandarda bolyp, elimizde, Senatta atqarylyp jatqan jumystar jóninde áńgimelemekshimiz. Oǵan qosa turǵyndardyń usynys-tilekterine qulaq túrip, óńirdi odan ári damytý baǵytynda oblys basshylyǵymen birlese jumystanýdy jalǵastyratyn bolamyz», dedi «QazAqparat» tilshisine Senat depýtaty.
