Senat depýtaty aýyldardaǵy sý qubyrlaryn túgendeýdi usyndy
«Memlekettik baǵdarlamalar halyqty aýyz sýmen tolyq qamtý jónindegi negizgi mindetti sheshpegenin moıyndaýymyz qajet. Búgingi tańda tipti qala halqy da osy negizgi qajettilikpen tolyq qamtamasyz etilmegen. Elimizdegi qala halqynyń 98%-dan astamy sýmen jabdyqtaý qyzmetterine qol jetkizgenine qaramastan, 9 óńirde (Jambyl, Pavlodar, Aqmola, Shyǵys Qazaqstan, Jetisý, Batys Qazaqstan, Qostanaı oblystary, Astana jáne Shymkent qalalary) bul kórsetkish ortasha respýblıkalyq deńgeıden tómen. Bul rette qamtamasyz etý deńgeıi 100%-ǵa jetetin óńirlerde de aýyz sýdyń sapasy men tolyq jetispeýi deıtin problema bar. Mysaly, Aqtaý jáne Jezqazǵan sııaqty qalalarda osy másele ózekti», - dedi senator.
Depýtattyń dereginshe, aýyldyq eldi mekenderde sýmen jabdyqtaý deńgeıi odan da nashar.
«Sebebi, 10 oblystyń (Aqmola, Aqtóbe, Almaty, Jambyl, Batys Qazaqstan, Qaraǵandy, Qostanaı, Soltústik Qazaqstan, Jetisý jáne Abaı) aýyldarynda aýyz sýǵa qol jetkizý kórsetkishi ortasha respýblıkalyq deńgeıden tómen. Sondaı-aq, aýyldyq eldi mekenderde paıdalanýshy qyzmetterdiń bolmaýy jáne jumys istep turǵan kásiporyndardyń materıaldyq-tehnıkalyq bazasynyń tozýy úlken prooblema bolyp tur. Salynǵan sý qubyry jelileri ákimdik apparattarynyń balansynda qalady nemese mindettemelerin oryndamaıtyn beıindi emes kásiporyndarǵa ne uıymdarǵa senimgerlik basqarýǵa beriledi», - degen Senat depýtaty aýyldyq eldi mekenderdegi sý qubyry jelilerin túgendeý jumystaryn júrgizýdi usyndy.
«Osyny eskere otyryp, qysqa merzimde paıdalanýshy uıymdar qyzmetiniń ońtaıly mehanızmin anyqtaý kerek dep sanaımyz. Olardy básekelestik ortaǵa berý arqyly nemese kommýnaldyq memlekettik kásiporynnyń janynan bıýdjet qarajaty esebinen jasaqtalǵan paıdalanýshy toptar qurý arqyly sheshýge bolady. Jaǵdaıdy tolyq bilý úshin óńirlerde, ásirese aýyldyq eldi mekenderde sý qubyry jelilerin túgendeý jumystaryn júrgizý qajet», - dedi Serik Shaıdarov.
Ashyq kózderden alynǵan foto
