Senat depýtaty: Áskerı vedomstvolarǵa bólinetin qarjy nege az
«Jaqynda ǵana Halyqaralyq qatynastar, qorǵanys jáne qaýipsizdik komıtetiniń músheleri Soltústik Qazaqstan oblysynda ótken kóshpeli otyrys barysynda Ulttyq ulan áskerı ınstıtýtynyń jabdyqtalýymen jáne oqý protsesiniń uıymdastyrylýymen tanysty. Sondaı-aq, áskerı bilim berý júıesin damytý máseleleri qarastyryldy. Ókinishke qaraı, áskerı oqý oryndarynyń materıaldyq-tehnıkalyq jáne oqý-ádistemelik bazasy bilim berý protsesine tıisti deńgeıde uıymdastyrýdy tolyǵymen qamtamasyz ete almaıdy», - dedi senator «2018-2020 jyldarǵa arnalǵan respýblıkalyq bıýdjet týraly» QR Zańyna ózgerister men tolyqtyrýlar engizý týraly» zań jobasyn talqylaý kezinde.
Onyń aıtýynsha, Ulttyq ulan jáne Tótenshe jaǵdaılar komıteti basshylyǵynyń aqparatyna sáıkes, ótken jyldary jetkiliksiz qarjylandyrý sebebinen vedomstvolyq baǵynyshty oqý oryndary ǵana emes, ózge de bólimshelerdiń materıaldyq-tehıkalyq jabdyqtalýy qanaǵattanarlyqsyz jaǵdaıda qalǵan.
«Bul máseleni Shyǵys Qazaqstan oblysyndaǵy sý tasqynyna baılanysty sońǵy oqıǵalar rastady. Meniń suraǵym: Ulttyq ulan men TJK ózderine júktegen mindetterin tıimdi oryndaý úshin jyl saıynǵy jetkiliksiz qarjylandyrý máselesi qashan jáne qalaı sheshiledi?», - dedi Musabaev.
Senatordyń bul suraǵyna QR Іshki ister mınıstriniń birinshi orynbasary Janat Súleımenov jaýap berdi.
«Ózińiz aıtyp ketkendeı, depýtattar toby eki ınstıtýtqa arnaıy baryp, oqý jaǵdaıyn tekserip, jeke qurammen kezdesken. Qazirgi ýaqytta Ulttyq ulan jáne TJD basshylary Ulttyq ulan ınstıtýtyna 375 mln, Kókshetaýdaǵy Tótenshe jaǵdaılar ınstıtýtyna 275 mln usynyp otyr. Ol arnaıy tehnıkasy úshin, kompıýterlik tehnıkaǵa jumsalady. Osy usynystardy naqty qarap otyrmyz. Naqtylaý bolsa soǵan engizýdi kózdeımiz. Bolmasa 2019 jylǵa qarastyrylatyn bıýdjetke engizemiz. Qazir osy naqtylaý boıynsha bizge 10 mlrd qarajat bólindi. Onyń 80 paıyzyn Ulttyq ulanǵa beremiz», - dedi Súleımenov.
