Senat depýtaty Aqtóbedegi ekologııalyq problemalardy atady
Óńirdegi negizgi ekologııalyq problemalardyń biri – aýanyń kúkirtsýtegimen lastanýy. Oǵan sebep – eskirgen tazartý qurylystary men káriz stansalarynyń sapasyz jumysy. Olar 40 jyldan astam ýaqyt buryn paıdalanýǵa berilgen.
«Eń basty ekologııalyq problemalarynyń biri – Aqtóbe qalasynyń atmosferalyq aýasynyń kúkirtsýtekpen lastanýy bolyp otyr. Oblys boıynsha ekologııa departamenti júrgizgen monıtorıng nátıjelerine sáıkes, kúkirtsýtek shyǵaryndylarynyń negizgi kózderi anyqtaldy. Olardyń qataryna qalalyq káriz jelileri, káriz tazartý nysandary jáne káriz sorǵy stantsııalary jatady. Aqtóbe qalasynyń káriz tazartý nysandary 40 jyl buryn paıdalanýǵa berilgen. ıAǵnı, atmosferanyń kúkirtsýtekpen lastanýy káriz jelileriniń eskirýi men sáıkes kelmeýinen, sondaı-aq káriz tazartý nysandarynyń tıimsiz qyzmetinen bolyp otyr», - dedi B. Qanıev Úkimet basshysy Álıhan Smaıylovtyń atyna joldaǵan saýalynda.
Senator aýany lastaıtyn negizgi zattardyń qatarynda «Qazhrom» kompanııasynyń Aqtóbe ferroqorytpa zaýytyn da atady. Munda qorshaǵan ortaǵa shekti ruqsat etilgen zııandy shyǵaryndylar normatıvten asyp túsken, óndiris jáne tutyný qaldyqtary durys esepke alynbaı jatyr. Taǵy bir ekologııalyq másele – Elek ózeniniń lastanýy.
«Kóterilgen máseleniń erekshe mańyzdy ekenin eskere otyryp, Úkimetten qalalyq káriz jelilerinde katalızatorlardy belsendi paıdalanýdy qamtamasyz etýdi suraımyz. Jedel túrde jańa káriz tazartý ǵımarattaryn salýdy qolǵa alýdy, mindettemelerdi oryndaýǵa qatysty ónerkásiptik kásiporyndarǵa baqylaýdy kúsheıtýdi, Elek ózenin hromnan tazartý boıynsha tıisti is-sharalardy qabyldaýdy suraımyz»,- dedi depýtat.
