Senat depýtaty Adaı jylqysyn zertteıtin ınstıtýtqa 300 mln teńge bólýdi surady

ASTANA. QazAqparat – Senat depýtaty Bekbol Orynbasarov depýtattyq saýalynda «Adaı» qazaq jylqysyn jeke tuqym retinde taný jáne oǵan resmı mártebe berý máselesin kóterdi, dep habarlaıdy QazAqparat tilshisi.

Senator «Adaı» jylqysyn derbes tuqym retinde moıyndaýǵa kedergi keltirip turǵan birneshe sebepti atady.

«Asyl tuqymdy mal sharýashylyǵy týraly» QR Zańynyń 28-2-baby boıynsha elimizdiń jylqy sharýashylyǵy salasynda tek eki palata jumys isteýge mindetti. Birinshisi - sporttyq baǵyttaǵy zaýyttyq tuqymdar boıynsha bolsa, ekinshisi - ónim baǵytyndaǵy (et, sút) jylqylardyń jergilikti tuqymy bolýǵa tıis. Alaıda, qazirgi tańda ónim baǵytyndaǵy jylqylardyń jergilikti tuqymy boıynsha 4 palata jumys isteıdi. Osyndaı palatalardyń kóp bolýynyń saldarynan jylqy tuqymdaryna berilgen «taıpalyq mártebeler» men «kýálikter» jaramsyz dep eseptelinedi. Sondyqtan, «dara tuqym» dep tanýǵa usynylǵan jylqylar paıdalaný deńgeıindegi (asyl tuqymdy emes) jylqylar bolyp qalyp otyr», - dedi Bekbol Orynbasarov.

Aıtýynsha, qazir qazaqstan aýmaǵynda osy tuqymǵa jatatyn 90 myń bas qylquıryq bar.

«Qazirgi tańda Qazaq mal sharýashylyǵy jáne jemshóp óndirisi ǵylymı-zertteý ınstıtýty júrgizigen ǵylymı-ekspedıtsııalyq zertteýrlerdiń qorytyndysy boıynsha Adaı tıptik jylqynyń sany 90 myńǵa jýyq. Atalǵan jylqyny óz betinshe dara tuqym retinde synaý úshin ınstıtýt ǵalymdary úsh ónimdi zaýyt jelisi qurylǵan bolatyn. Jalpy selektsııalyq, asyl tuqymdy jumystar júrgizýge ınstıtýt 2022 jyly óziniń bıýdjetten tys qarajaty esebinen 20 mln teńge bóldi. Bul qarajat aldaǵy mindetke qol jetkizýge jetkiliksiz. Negizinde selektsııalyq jumystardy uıymdastyrýǵa keminde 300 mln teńge kóleminde qarajat qajet. Óıtkeni tek qana CNP arqyly gendik tıpteý jumystaryn júrgizýge 1800 bas referenttik topty bólý úshin orta eseppen 160 mln teńgeden astam qarjy jumsalady», - dedi senator.