Senat depýtattyǵynyń 1 mandatyna ortasha básekelestik 4 adamdy qurap otyr
Bul týraly búgin QR Ortalyq saılaý komıssııasynyń otyrysynda OSK tóraǵasy Qýandyq Turǵanqulov málim etti.
Toqtala ketetin jaıt, tamyzdyń 2-sinen beri Qazaqstan Respýblıkasy Parlamenti Senatynyń depýtattyǵyna kandıdattar usyný bastalyp, olardyń sany búginde 72-ge jetken.
«Ázirshe, depýtattyqtyń 1 mandatyna ortasha básekelestik 4 adamdy qurap otyr. Sonyń ishinde eń az básekelestik respýblıkanyń eki óńirinde baıqalady, olarda bir mandatqa 3 adamnan talasady. Al eń kóp básekelestik saılaý ótetin úsh oblysta - 1 mandatqa 6 kandıdattan keledi», - deıdi OSK tóraǵasy Qýandyq Turǵanqulov.
Onyń aıtýynsha, saılaý naýqanynyń kúntizbelik josparyna sáıkes, kandıdattardy usyný 31 tamyzǵa deıin jalǵasady. Al kandıdattardy tirkeý oblystyq, Astana jáne Almaty qalalyq saılaý komıssııalarynda 11 qyrkúıekke deıin júzege asady.
«Eger usynylǵan kandıdattardyń jasyna kelsek, olardyń basym bóligi 45-55 jastaǵylar. Bular 33 adamdy quraıdy nemese jalpy usynylǵandardyń 45 paıyzyna teń», - dedi OSK basshysy.
