Senat depýtattyǵyna úmitker 17 kandıdat saılaýǵa túse almady
ASTANA. QazAqparat - Senat depýtattyǵyna úmitker 17 kandıdat saılaýǵa túse almady. Bul týraly búgin QR Ortalyq saılaý komıssııasynyń tóraǵasy Qýandyq Turǵanqulov málim etti.
«Senat depýtattyǵyna úmitker 17 kandıdatty saılaýǵa túsýge tirkeýden bas tartyldy. Negizgi sebepteriniń biri - olar oblystyq saılaý komıssııalaryna der ýaqytynda qajetti qujattardy ótkize almady. Bul negizinen kandıdattardyń ózderin qoldaýshy depýtattardyń qoldaryn jınaýǵa qatysty oryn aldy. Olar qajetti qol jınaı almady», - dedi Q.Turǵanqulov.
OSK tóraǵasynyń atap ótýinshe, 2 kandıdat Konstıtýtsııa talaptaryna saı kelmegeni úshin tirkeýden ótpegen.
«Olar ózderi saılaýǵa túsip otyrǵan aımaqta 3 jyl turý talabyn oryndamady. Іs sotqa deıin jetip, olardyń talaptary oryndalǵan joq», - dedi ol. Sonymen qatar Ortalyq saılaý komıssııasy deklaratsııaǵa baılanysty tirkeýden óte almaı qalǵan úmitkerdiń bolmaǵanyn basa aıtty.
