Senat depýtattyǵyna kandıdattar saılaý aldyndaǵy úgitke kiristi
ASTANA. QazAqparat - Qazannyń 1-ine belgilengen saılaýǵa oraı, búgin, 12 qyrkúıekten bastap Senat depýtattyǵyna kandıdat retinde tirkelgen barlyq úmitkerler úgit naýqanyna kirise alady. Saılaý aldyndaǵy úgit naýqany 2014 jyldyń 29 qyrkúıek kúni saǵat 24.00-ge deıin júrgiziledi. Bul týraly búgin brıfıngte Ortalyq saılaý komıssııasynyń múshesi Lázzat Súleımen málim etti.
«Barlyq kandıdattarǵa úgit jumysyn júrgizý úshin teń jaǵdaılarǵa kepildik berilgen. Atap aıtqanda, buqaralyq aqparat quraldary arqyly úgit jumysyn júrgizý úshin árbir kandıdatqa respýblıkalyq bıýdjetten teń mólsherde teledıdardan 15 mınýttyq sóz sóıleýine, radıodan on mınýttyq sóz sóıleýine, sondaı-aq, baspa basylymdarynda 0,1 baspa tabaqtan aspaıtyn kólemde eki maqala jarııalanýyna qarajat bólingen», - deıdi L. Súleımen.
Budan bólek, kandıdattardyń saılaý aldyndaǵy úgiti zańda belgilengen tártippen qurylatyn saılaý qorlarynyń qarajatynan qarjylandyrylýy múmkin. Bul rette Senat depýtattyǵyna kandıdattardyń árqaısysy jalpy qarajat mólsheri 13 mln. 976 myń 200 teńgeden aspaýǵa tıis saılaý qoryn qura alady.
Al jergilikti atqarýshy organdar tıisti saılaý komıssııalarymen birlesip, barlyq kandıdattar úshin úgittik baspa materıaldaryn ornalastyrý ornyn belgileıdi.
Úgit naýqany barysynda saılaý zańnamasy normalarynyń saqtalýyn baqylaýdy qamtamsyz etý maqsatynda Ortalyq saılaý komıssııasy, oblystyq, Astana jáne Almaty qalalyq saılaý komıssııalary buqaralyq aqparat quraldaryna monıtorıng júrgizetin bolady.
Eske sala keteıik, qazan aıynda ótetin saılaýǵa usynylǵan 88 úmitkerdiń 53-i tirkeýden ótken bolatyn.
