Senat depýtattarynyń saılaýynda 39 kandıdat balamaly saılaýǵa túsýde - OSK
TANA. 19 tamyz. QazAqparat /Aıdar Ospanalıev/ - Qazaqstannyń 16 óńirinde osy ýaqytta Qazaqstan Respýblıkasy Parlament Senatynyń depýtattaryn saılaý boıynsha daýys berý sharalary júrip jatyr.
Bul týraly búgin Senat depýtattarynyń saılaýyna baılanysty jýrnalısterge suhbat bergen Ortalyq saılaý komıssııasynyń hatshysy Baqyt Meldeshov málim etti.
Onyń aıtýynsha, elimizdiń «Saılaý týraly» zańyna sáıkes, tańdaýshylardyń birlesken otyrysy, eger oǵan tıisinshe oblystyq barlyq máslıhattardyń jáne Astana men Almaty qalalary máslıhattary depýtattarynyń 50 paıyzdan astamy qatyssa, saılaý ótkizilgen bolyp esepteledi. «Osy ýaqytta respýblıkada ártúrli deńgeıde 213 máslıhat, al olarda 3 myń 335 depýtattyq mandat bar. Olardyń 51-i qazir bos. Osylaısha búgingi saılaýǵa qatysatyn saılaýshylar tizimi 3 myń 284 adamdy qurap otyr. Daýys berý bıýlletenderinde Senat depýtattyǵyna kandıdat retinde tirkelgen 39 adamnyń aty-jóni engizilgen. Elimizdiń barlyq óńirlerinde saılaý balamaly negizde ótýde»,-dedi hatshy.
Onyń málimetterinshe, Astana ýaqyty boıynsha saǵat 10-00-degi jaǵdaı boıynsha, tańdaýshylardyń otyrystary Astana, Almaty qalalarynda, sondaı-aq Atyraý, Qostanaı, Qyzylorda, jáne Soltústik Qazaqstan oblystarynda ashylǵan. «Astanada tańdaýshylardyń 96 paıyzy, Almatyda 91,9 paıyzy, Atyraý oblysynda 95,5 paıyzy, Qostanaı oblysynda 98,3 paıyzy, Qyzylorda oblysynda 91,8 paıyzy jáne Soltústik Qazaqstan oblysynda 98,1 paıyzy qatysýda. Basqa óńirlerde tańdaýshylardyń birlesken otyrysy Astana ýaqyty boıynsha saǵat 11-00-de ashyldy. Oblystyq Astana jáne Almaty qalalyq saılaý komıssııalarynyń málimetteri boıynsha, osy kezge deıin Senat depýtattyǵyna kandıdattardyń 15 senim bildirgen adamdary tirkelgen. Sondaı-aq shet memleketter men halyqaralyq uıymdardyń 22 baıqaýshysy, saıası partııalardyń 9 baıqaýshysy, qoǵamdyq uıymdardan 12 baıqaýshy jáne buqaralyq aqparat quraldarynan 90 ókil tirkelgen», dedi Baqyt Meldeshov.
