Senat depýtattarynyń saılaýyna áıel kandıdattardy belsendi qatystyrý kerek - B. Tutqyshev
ASTANA. 24 maýsym. QazAqparat /Qanat Mámetqazyuly/ - Aldaǵy tamyz aıynda ótetin QR Parlamenti Senatynyń depýtattaryn saılaýǵa áıel kandıdattardy belsendi túrde qatystyrý kerek.
Bul týraly búgin Qazaqstan Respýblıkasy Prezıdentiniń janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń otyrysy barysynda komıssııa múshesi Beksultan Tutqyshev aıtty.
«Búgingi kúni Parlament Senatynda eki áıel ǵana bar, olar - Svetlana Jalmaǵambetova men Nurlyǵaıym Joldasbaeva. Bular múldem azshylyqty bildiredi. Degenmen, qazirgi tańda Senat depýtattyǵyna kandıdattardy usyný júrgizilip jatyr, alaıda men kandıdattar tiziminen eshqandaı da áıelder qaýymynyń ókilderin kórip otyrǵan joqpyn. Ózin-ózi usynǵandar arasynda da áıelder múldem joq», - dedi B.Tutqyshev. Onyń aıtýynsha, bundaı jaǵdaı EQYU sheńberinde jáne basqa da halyqaralyq uıymdarda Qazaqstan qabyldap, alǵan mindettemelerine, sondaı-aq Elbasy N. Nazarbaevtyń tapsyrmalaryna esh sáıkes kelmeıdi. Osyǵan oraı, Ulttyq komıssııa múshesi «Nur Otan» HDP men Memleket basshysynyń atyna Senat depýtattyǵyna áıel kandıdattardy usynýdy belsendirýge qoldaý bildirý týraly usynyspen shyǵatynyn jetkizdi. Bul máseleni kóterýmen, sondaı-aq Qazaqstan Respýblıkasy Prezıdentiniń janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa aınalysatyn boldy.
