Senat depýtattarynyń saılaýy: Sanıtarlyq normalar qatań saqtalmaq
QR OSK otyrysynda naýqan kezindegi indettiń taralýyna jol bermeý sharalary qaraldy.
QR Ortalyq saılaý komıssııasynyń tóraǵasy Berik Imashevtyń aıtýynsha, koronavırýs ınfektsııasynyń taralýyn boldyrmaý, sanıtarlyq qaýipsizdik, sondaı-aq saılaý protsesine qatysýshylardyń densaýlyǵyna alańdaýshylyq turǵysynda Qazaqstan Respýblıkasynyń Bas memlekettik sanıtarlyq dárigerimen birlesip birqatar usynystar ázirlendi.
Óz kezeginde QR OSK múshesi Serik Sydyqov Senat depýtattaryn saılaý kezinde ınfektsııanyń taralýyn aldyn alý boıynsha usynystar daıyndalǵanyn, osy oraıda tıisti qaýlynyń jobasy bar ekenin atap ótti.
«Bul usynystardyń jobasy densaýlyq saqtaý mınıstrligindegi mamandarmen jan-jaqty pysyqtaldy. Usynymdar saılaý barysyndaǵy úgit-nasıhat jumystaryn júrgizýde, birlesken otyrys ótkizýde jáne daýystardy sanaý kezinde saılaý protsesine qatysýshylardyń qaýipsizdigin qamtamasyz etýge baǵyttalǵan. Óńirlerde osy usynystardyń oryndalýyn qamtamasyz etý boıynsha tolyq múmkinshilikter bar. Osy oraıda tıisti daıyndyq jumystary júrgizilýde», - dedi S. Sydyqov.
Onyń sózine qaraǵanda, daýys berýge arnalǵan pýnkterde arnaıy kabınalarda, basqa da tehnıkalyq jabdyqtardy ornalastyrýda 1,5-2 metrlik araqashyqtyqty saqtaý qarastyrylǵan. Daýys berý jáshikterin ashýdyń aldynda olardy antıseptıkalyq quraldarmen óńdeý qajettigine jáne saılaý protsesine qatysýshylardyń jeke qorǵaný quraldarymen qamtamasyz etýge basa nazar aýdaryldy.
«Daýys berý oryndarynda medıtsına qyzmetkerleriniń kezekshiligin uıymdastyrý kózdelgen», - dedi Serik Sydyqov.
Budan buryn habarlanǵandaı, búgin QR Ortalyq saılaý komıssııasynyń otyrysynda Parlament Senaty depýtattyǵyna kandıdattardy tirkeý kezeńiniń qorytyndylary qaraldy.
2020 jylǵy 24 shildedegi jaǵdaı boıynsha elimizde Senat depýtattyǵyna saılaý komıssııalary 58 kandıdatty tirkedi. Ortasha alǵanda bir orynǵa úsh úmitker bar.
Aıta keteıik, 2014 jyly saılanǵan Senat depýtattarynyń ókilettik merzimi osy jyldyń qazan aıynda aıaqtalady. Osylaısha, 2020 jyldyń 12 tamyzynda elimizdiń joǵary zań shyǵarýshy organy joǵary palatasyna 17 óńirden bir-bir depýtattan saılanýy qajet.
