Senat depýtattarynyń saılaýy: Kúntizbelik jospar bekitildi
NUR-SULTAN. QazAqparat - Búgin onlaın rejımde QR Ortalyq saılaý komıssııasynyń otyrysynda bıylǵy 12 tamyzǵa belgilengen Parlament Senatynyń depýtattaryn saılaýǵa daıyndyq jáne ony ótkizý jónindegi negizgi is-sharalardyń kúntizbelik jospary bekitildi, dep habarlaıdy QazAqparat tilshisi.
Otyrysty ashqan Ortalyq saılaý komıssııasynyń tóraǵasy Berik Imashev 2014 jyly saılanǵan Senat depýtattarynyń ókilettik merzimi aǵymdaǵy jyldyń qazan aıynda aıaqtalatynyn atap ótti. Osylaısha, 2020 jyldyń 12 tamyzynda elimizdiń joǵarǵy zań shyǵarýshy organy joǵarǵy palatasyna 17 óńirden bir-bir depýtattan saılanýy qajet.
QR Ortalyq saılaý komıssııasy tóraǵasynyń orynbasary Konstantın Petrovtyń aıtýynsha, Senat depýtattyǵyna kandıdattardy tirkeý barlyq qajetti qujattardy alǵannan keıin bastalady jáne saılaý kúninen jıyrma kún buryn jergilikti ýaqyt boıynsha saǵat 18.00-de, ıaǵnı 2020 jylǵy 23 shildede jergilikti ýaqyt boıynsha saǵat 18.00-de aıaqtalady. Saılaý aldyndaǵy úgit-nasıhat kandıdattardy tirkeý merzimi aıaqtalǵan kezden, ıaǵnı 2020 jylǵy 23 shildede saǵat 18.00-den keıin bastalady jáne daýys berý kúniniń aldyndaǵy kúngi jergilikti ýaqyt boıynsha 11 tamyzda saǵat 00.00-de aıaqtalady.
Ortalyq saılaý komıssııasy 2014 jyly saılanǵan Senat depýtattarynyń ókilettik merzimi aıaqtalǵanǵa deıingi merzimde, ıaǵnı 2020 jylǵy 14 qazanǵa deıin Senattyń jańadan saılanǵan depýtattaryn tirkeıdi.
QR Konstıtýtsııasyna sáıkes, Senatty Konstıtýtsııalyq zańda belgilengen tártippen árbir oblystan, respýblıkalyq mańyzy bar qaladan jáne Qazaqstan Respýblıkasynyń astanasynan eki adamnan ókildik etetin depýtattar quraıdy.
Senat depýtattaryn janama saılaý quqyǵy negizinde jasyryn daýys berý kezinde tańdaýshylar – máslıhat depýtattary saılaıdy, olardy óz kezeginde jalpyǵa birdeı saılaýda Qazaqstan Respýblıkasynyń azamattary saılaıdy. Senat depýtattarynyń ókilettik merzimi alty jyldy quraıdy. Bul rette, jartysy árbir úsh jyl saıyn qaıta saılanyp otyrady. Parlament Senaty depýtattarynyń saılaýyn uıymdastyrý men ótkizýge Ortalyq saılaý komıssııasy basshylyq etedi. Tıisti aýmaqtyq saılaý komıssııalary Parlament depýtattarynyń saılaýyn óńirlerde daıyndaýdy jáne ótkizýdi qamtamasyz etedi.
